Preténdese poñer en valor a figura deste directivo da industria audiovisual nacional pola súa contribución á difusión e recoñecemento da Feira do Cocido
O goberno leva a Pleno de decembro (venres 27 ás 10 horas) unha proposta de Alcaldía para outorgarlle a Manuel Villanueva de Castro a concesión dunha das distincións honoríficas e condecoracións reservadas a personalidades polos seus méritos especiais, cualidades, circunstancias singulares ou servizos extraordinarios a favor do municipio. Concretamente trátase de distinguilo como Fillo Adoptivo de Lalín pola súa contribución á difusión e recoñecemento da Feira do Cocido e, en especial, no que se refire á súa declaración como Festa de Interese Turístico Internacional.
No seu informe a Comisión de Honras e Distincións sinala que Manuel Villanueva de Castro (Marín, 1957), contribuíu “dun xeito notable e desde o ano 2002 ao traballo de divulgación da Feira do Cocido como comunicador e creador galego cunha destacada experiencia no ámbito televisivo desenvolvendo o seu labor como directivo de recoñecido éxito na TVG, Antena 3 Televisión, Canal Plus e ata hai pouco como director xeral de Contidos de Telecinco, que deste Madrid e, en base á responsabilidade que exerceu no seu desempeño profesional, fixo que a nosa Feira estivera incluída sempre en espazos televisivos preferentes na cadea Telecinco, non só o día grande, senón ao longo da celebración de máis dunha vintena de actos ao redor desta Festa de Interese Turístico Internacional”.
“Unha difusión e promoción de difícil cuantificación económica se houbera que pagar os espazos televisivos a nivel nacional nos que a Feira do Cocido tivo presenza en horas de máxima audiencia e a nosa vila foi plató televisivo da cadea en numerosas ocasións”, sinala o dito informe. Unha das últimas veces foi co pregoeiro Ribagorda que realizou o informativo de mediodía desde a Praza da Igrexa pola Feira do Cocido do 2023.
Tamén pon en valor a Comisión que “Manuel Villanueva ten brindado unha especial colaboración ao alcalde de Lalín na realización de importantes e definitivas xestións en Madrid desde 2006 en que foi nomeado Comendador do Cocido asistindo a numerosos actos, promovendo a nosa Feira e posibilitando a presenza de numerosas personalidades de recoñecida popularidade e prestixio en distintas edicións da Feira do Cocido, como pregoeiros e comendadores e mesmo invitados de honra, cos que mantén bo trato e relación por amizade e profesión e que axudaron coa súa presenza a engrandecer a Feira do Cocido e a nosa gastronomía e, de paso, o noso municipio e as súas xentes”.
Así mesmo destaca que no ano 2007 mediou para que o recoñecido cociñeiro e presentador de televisión Karlos Arguiñano aceptara ser premiado da XXXIX Feira do Cocido, dedicándolle días despois un dos seus programas habituais en Telecinco á feira lalinense. Tres anos despois, no 2010 xestionou a presenza da actriz galega María Castro para que exercera de pregoeira, aceptando tamén ser Comendadora na XLII edición da Feira.
No dito informe de méritos tamén se establece que no ano 2012 mediou para que o xornalista e presentador de televisión, Pedro Piqueras, fora o pregoeiro da XLIV Feira do Cocido e dous anos despois, no 2014, contribuíu a que o escritor, político, economista, divulgador científico e presentador televisivo Eduardo Punset Casals aceptase ser o pregoeiro no ano 2014, edición da Feira á que tamén asistiron pola súa mediación a actriz Vanesa Romero ben coñecida pola serie “La que se avecina” e o presidente do Atlético de Madrid, Enrique Cerezo, que foron nomeados membros da Encomenda do Cocido, ao igual que a actriz e presentadora galega Cristina Castaño. Tamén interviu na presenza da xornalista, escritora e presentadora televisiva, Sonsoles Ónega pregoando a Feira do Cocido de 2020, na primeira edición da Feira que se celebrou co recoñecemento de “Festa de Interese Turístico Internacional”.
Cómpre subliñar que de acordo ao informe da Comisión “en todas as ocasións que o alcalde chamou a Manuel Villanueva solicitando a súa axuda para conseguir un determinado pregoeiro/a ou comendador/a de recoñecida popularidade e notable prestixio, sempre accedeu a realizar as xestións e estas sempre frutificaron, segundo ten manifestado o propio alcalde publicamente en varias ocasións”.
Premios e distincións en Lalín
A Comisión de Honras concreta que por este labor de apoio e contribución á Feira, Villanueva xa recibira en 2012 un agradecemento público no Pleno celebrado o 2 de maio e entregóuselle un pergamiño acreditativo deste agradecemento do Concello de Lalín, acto que se levou a cabo o 9 de xuño no salón de Plenos do Concello. Un acordo por proposta do alcalde Crespo Iglesias que se acordou por maioría, con 19 votos a favor, 2 abstencións e ningún voto en contra.
En 2023 Manuel Villanueva gañou o XXIX Premio Nacional de Xornalismo Gastronómico Álvaro Cunqueiro co artigo “Breve historia de un cocido gallego en Madrid” publicado en Faro de Vigo, recoñecido como o premio gastronómico máis importante de España.
Síntese biográfica
Manuel Villanueva de Castro (Marín, 1957) comezou a súa traxectoria profesional en Radio Pontevedra (Cadena SER), saltou a Radio 80 Pontevedra e en 1985 formou parte do equipo fundacional da cadea autonómica pública Radio Galega, pasando posteriormente á Xefatura de Emisións e Programación da Televisión de Galicia. Coa chegada das privadas, o directivo converteuse en 1990 en director de Programación da recen nacida cadea Telecinco, dende a que saltou a Canal+ para asumir o mesmo cargo e posteriormente converteuse en xefe de Contidos de Antena 3. En 2002 volveu a Telecinco baixo as ordes de Paolo Vasile, que acuñou unha televisión tan rendible coma polémica. En recoñecemento á súa traxectoria profesional foi distinguido co Premio Talento 2006 pola Academia de las Ciencias y las Artes de Televisión.
Villanueva nunca cortou o cordón umbilical coa súa terra galega, tal e como deixou ver nos últimos tempos. En 2022, foi nomeado “Fillo Adoptivo de Ourense” pola Deputación Provincial e nese mesmo ano deu o pregón das festas no seu Marín natal e obtivo a Insignia de prata das Xornadas de Cine e Vídeo de Galicia do Carballiño, vila na que pasou boa parte da súa xuventude.
A maiores, o pasado ano 2023 recibiu o Premio OUFF Televisión na 28ª edición do Ourense Film Festival (OUFF), que recoñeceu a súa "ampla e exitosa traxectoria profesional no mundo da televisión”.
Villanueva, próximo a rematar os seus labores como director xeral de Contidos de Mediaset España (empresa á que pertence Telecinco) pensa continuar no medio audiovisual e tamén no xornalismo escrito, no que se iniciara colaborando en Diario de Pontevedra, La Voz de Galicia (na que publicaba textos eloxiosos sobre o “seu” Celta), La Región, Faro de Vigo, nas revistas Luzes e Tapas, no xornal El Mundo ou o extinto xornal dixital Nius, cunha sección gastronómica. Tamén é autor dos libros “Por el camino primitivo. Peregrinar a Compostela” (Fundación Caixa Galicia, 2008, coautor con Jesús Villamil) e 'Palabra de Vino' (Muddy Waters Books, 2021).
A outros niveis Manuel Villanueva formou parte en numerosas ocasións como xurado de diferentes certames de importantes congresos como Madrid Fusión e San Sebastián Gastronomika.
Chegada a idade de xubilación, Manuel Villanueva de Castro, considerado como un do directivos máis recoñecidos da industria audiovisual nacional, con notable éxito a fronte das catro grandes cadeas privadas de televisión en España, ten manifestado o seu desexo de seguir traballando neste sector que tan ben coñece e, ao tempo, continuar colaborando coma ata o de agora na difusión e promoción da Feira do Cocido de Lalín. Deste xeito desde o pasado mes de outubro é membro da Academia Gastronómica Madrileña e segue a ser Embaixador nacional do viño.
