Concello de LALÍN

O catedrático de Medicina Legal da Universidade de Santiago de Compostela, Ángel Carracedo Álvarez, tamén director da Fundación Pública de Medicina Xenómica (Sergas-Xunta de Galicia), abrirá o vindeiro venres 17 de xaneiro o II Ciclo de Conferencias sobre Saúde “COIDA(te). ESCOITA (te)”, que promove o goberno a través da Concellería de Sanidade e Hábitos Saudables que dirixe Noelia Seijas, e no que participarán figuras de prestixio distintas ramas do ámbito sanitario. Deste xeito, continúase a andaina iniciada o pasado ano con esta serie de conferencias sanitarias que tiveron un elevado éxito polo interese e a participación da veciñanza.

O Dr. Ángel Carracedo disertará sobre “enfermidade, xenes e ambiente” nunha conferencia de entrada libre e que se desenvolverá ás sete da tarde no edificio sociocultural da rúa Manuel Rivero (como todas as deste ciclo). A concelleira Noelia Seijas convida á veciñanza a que participe neste novo ciclo de conferencias sobre distintos aspectos de saúde que son de interese para todos e agarda que esperten un interese alto como na pasada edición.

O catedrático de Medicina Legal e director da Fundación Pública de Medicina Xenómica explicará na súa conferencia que na saúde e na enfermidade somos xenes e ambiente, entendendo por ambiente, o que nos afecta como a alimentación, o consumo de tabaco e alcohol, o estilo de vida, os afectos, as infeccións, etc. Tamén sinalará como dependendo do tipo de enfermidade, poden ser máis xenéticas as causas ou ter máis importancia o ambiente. Por exemplo, as enfermidades hereditarias son máis xenéticas e o cancro de pulmón é máis derivado do consumo de tabaco, unha causa máis ambiental.

Saber determinar un ou outro compoñente é moi importante para poder entender as enfermidades, predicilas, buscar tratamentos e, todo isto, é a base do que se chama medicina personalizada. Carracedo avanzará así mesmo como se fai a busca destes compoñentes, que é a xenética, como se buscan e deseñan tratamentos novos e como se pode predicir as enfermidades.

Tamén falará dos grandes proxectos europeos como o de Un millón de xenomas, as iniciativas en España como o programa IMPaCT e o Proxecto Xenoma de Galicia, un dos mais ambiciosos do mundo.

Ángel Carracedo é catedrático de Medicina Legal da Universidade de Santiago (USC) desde 1990. Director da Fundación Pública Galega de Medicina Xenómica (SERGAS-Xunta de Galicia) desde 1998, o centro onde se centraliza o diagnóstico xenético de Galicia con máis de 40.000 doentes por ano.

O grupo que dirixe (Medicina Xenómica) consta de 10 grupos de investigación e varias plataformas tecnolóxicas. Director do Grupo de Xenómica do CIMUS, da área de Xenómica e Bioloxía de Sistemas do IDIS e do Grupo de Xenómica traslacional do CIBERER.

Presidente e co-director científico da Fundación Kaertor (para busca precoz de fármacos), presidente da Fundación INGADA (sobre atención e estudo do TDAH e trastornos asociados) e outras fundacións e asociacións sen ánimo de lucro.

Publicou 12 libros e máis de 800 artigos en revistas internacionais incluíndo numerosos artigos en Nature, Sciencie, Cell, Nature Genetics, ademais das principais revistas de xenética médica, cancro e medicina forense (Google Scholar Ángel Carracedo). As súas principais liñas de investigación actuais inclúen a xenética do cancro e das enfermidades psiquiátricas en idade infantil, as enfermidades raras e a medicina personalizada. Director do Programa IMPacT Xenómica e do Centro Nacional do Xenotipado. Os seus traballos reciben actualmente unha media de ao redor de 6.000 citacións por ano.

Ditou máis de 3.500 conferencias convidadas en máis de 70 países, máis de 1.000 charlas divulgativas e dirixiu máis de 100 teses doutorais.

Membro do Board de sociedades científicas nacionais e internacionais de Xenética, farmacoxenómica, cancro e Medicina forense. Participou ou participa en organismos reguladores e axencias (Agencia Europa del Medicamento -EMA, Forensic DNA Regulataor, UK, CNUFADN, Comité da Cruz Roja Internacional, Consorcio Internacional de Enfermidades raras, Comité forense do Tribunal Penal Internacional da Haya, etc.).

Membro do consello asesor de numerosos centros de investigación nacionais e internacionais e departamentos ministeriais. Presidente da International Academy of Legal Medicine. Ex presidente da International Society for Forensic Genetics. Ex director do Instituto de Ciencias forenses da USC. Ten seis sexenios docentes e de investigación e un de transferencia.

Académico das Reais Academias Galegas de Ciencias, Farmacia e Medicina, do Consello da Cultura Galega e do Alto Consejo Consultivo da Generalitat de Valencia.

Ten recibido numerosos premios entre os que destacan o Premio Rey Jaime I de investigación (o máis importante de España, concedido por un xurado de máis de 20 premios Nobel), Adelaide Medal (a distinción máis importante do mundo forense a nivel mundial), Galien Medal (coñecida como o Premio Nobel do Medicamento), Medalla de Ouro e Prata de Galicia, Premio Nacional de Xenética, Cruz ao Mérito Policial, Cruz ao Mérito da Garda Civil, Medalla de Ouro e brillantes do Colexio Médico, Premio Fernández Latorre, Premio Prismas de Divulgación, Premio Galicia de Investigación, Medalla Castelao, Premio Novoa Santos, Premio Otero Pedrayo, Zendal Award, Premio FEDER, Premio Aelmhu, entre outros moitos.

Doutor Honoris Causa por oito universidades de Europa e América e membro de varias academias a nivel nacional e internacional.

Neste ciclo de conferencias sobre saúde, tomarán parte ademais do Dr. Ángel Carracedo; Maruxa Zapata, licenciada en Farmacia, diplomada en Nutrición Humana e Dietética e doutora en Epidemioloxía e Saúde Pública que falará sobre “Como descifrar as etiquetas dos alimentos”; a neurocirurxiá e especialista en Cirurxía minimamente invasiva de columna, cirurxía endoscópica lumbar e craneal, Dolores Varela que disertará sobre “Patoloxía dexenerativa de columna vertical e lumbar” e a doutora Ángela Torres Iglesias, do servizo de Psiquiatría CHUS-Sergas, catedrática de Psiquiatría de Medicina e Odontoloxía na USC, vicedecana de Intercambios, Calidade e Innovación educativa da Facultade de Medicina e Odontoloxía da USC, Ángela Torres.