É aberta á participación da veciñanza e desenvolverase o luns, 14 de abril ás 19 horas no edificio sociocultural e contará cun testemuño real dunha persoa transplantada
A concelleira de Sanidade, Noelia Seijas, informa que “o luns, 14 de abril, ás 19 horas, no edificio sociocultural da rúa Manuel Rivero terá lugar unha charla sobre doazón de medula ósea, promovida polo Concello en colaboración con Asotrame (Asociación Galega de Afectados de Transplantes Medulares e Enfermidade Oncohematolóxicas)”.
Seijas indica que “a charla abranguerá a presentación da asociación Asotrame e do procedemento da doazón da medula ósea, na que haberá polo menos unha testemuña real dunha persoa transplantada”.
“É unha charla aberta á participación da veciñanza, polo que se anima aos/as lalinenses a tomar parte nela porque se trata de concienciar sobre a importancia que teñen este tipo de xestos á hora de poder salvar vidas, e tamén se explica o procedemento para levar a cabo a doazón”, sinala. “É unha boa ocasión para achegar a cidadanía estes procesos e de explicarlles que non son tan complexos como a priori se pensan”, remarca.
Sinalar que Asotrame ten como obxectivo primordial prestar apoio ás persoas afectadas por un cancro hematolóxico e ás súas familias. Traballan día a día para sensibilizar e informar sobre a importancia de facerse doente de medula ósea e ao mesmo tempo de colaborar na investigación contra a leucemia e outras enfermidades de sangue.
