· A UTE Monrabal-Framiñán xa está en disposición do control de practicamente todas as CUPS de subministros o que permite a optimización de contratos de subministros co axuste da potencia contratada a compensación de enerxía reactiva
O concelleiro de Servizos, José Cuñarro Torres, vén de anunciar que nos sete meses que leva funcionando a ESE do edificios, xestionada pola UTE Monrrabal-Framiñán, xa se produciu unha redución nos consumos eléctricos do 30% co cambio dunha parte das luminarias dos edificios públicos lalinenses. Un cambio de elementos de iluminación que prosegue e que afectará a máis dun centenar de edificios.
A nivel cuantitativo, dicir que no mes anterior á entrada da ESE, en agosto de 2024, realizouse a liña base de consumos enerxéticos dos edificios públicos que quedou fixado en 2.893.842 KW. A estimación para os 12 primeiros meses do contrato, de setembro a setembro, os consumos enerxéticos, xa quedaron fixados en 1.950.000 Kw, o que supón unha redución do 33% dos consumos relativos a enerxía eléctrica dos edificios municipais, despois de cambiadas as luminarias e os elementos de consumo eléctricos a uns máis modernos e con tecnoloxías de baixo consumo. Aínda así, o obxectivo final, unha vez se produza a substitución da totalidade das luminarias e diversos elementos eléctricos é que ese consumo quede no entorno do 1.500.000 Kw.
Ademais de realizar as tarefas de mantementos e substitución de elementos por uns máis eficientes, a empresa está a seguir o mesmo procedemento en todas as instalacións. Analiza o uso da enerxía en cada edificio e realiza modificacións do funcionamento que permiten unha redución do consumo de enerxía (axuste de horarios, modificacións de consignas de temperaturas interiores, axuste de consignas de equipos, axustes do sistema de control).
No caso da consistorial, ter recuperado o control sobre as instalacións do edificio do Concello (que antigamente funcionaba con sistema propietario) foi importante, xa que agora pódense ir solucionando avarías existentes, controlando horarios e optimizando o gasto enerxético dos equipos.
Actualmente a UTE de Servicios Energéticos de Lalín xa está en disposición do control de practicamente todas as CUPS de subministros, o que permite a optimización de contratos de subministros co axuste da potencia contratada a compensación de enerxía reactiva. Estas medidas xa están tendo efecto sobre o consumo.
Ao mesmo tempo deste proceso, a ESE leva realizado unha parte xa notable do investimento coa substitución de luminarias. Edificio do Concello, parking Europa, garderías, campo de fútbol de Vilatuxe, Lalín Arena e a maior parte dos locais sociais xa viron cambiados os seus elementos de iluminación.
