- Esta actividade enmarcada en “Lalín nas Letras 2025”, programación municipal das Letras Galegas, abrangue a presentación do libro de Icía Varela e Xosé Manuel Varela como un legado da música e a poesía popular e tamén se ofrecerá música en directo a fin de achegar aos asistentes a lingua galega e a tradición oral
A modo de homenaxe á figura das “Cantareiras”, a quen nesta edición 2025 se lle dedican as Letras Galegas, o vindeiro xoves 8 de maio, terá lugar a presentación do libro “Cantareiras” de autoría de Icía Varela e Xosé Manuel Varela e tamén terá lugar un concerto ao redor da música tradicional. Será nun evento aberto ao público que terá lugar ás 20.30 horas no Museo Municipal Ramón Mª Aller e enmarcado dentro da programación “Lalín nas Letras 2025”. É un percorrido polo legado da música e a poesía popular. A tradición das pandereteiras da man de Icía Varela e de Xosé Manuel Varela.
Begoña Blanco remarca que “esta actividade proponse desde a Concellería de Cultura ademais de como a presentación dun libro ao redor das protagonistas das Letras deste ano tamén como un evento participativo e dinámico en torno á música tradicional, ás cantareiras e ás pandereteiras”. “Ofrecerase música en directo e explicarase a publicación de Cantareiras como un paseo polo legado das pandereteiras de Mens, Cerceda e Muxía co obxectivo de facer chegar aos asistentes á importancia da literatura oral”, fai fincapé.
“Presentaranse ás pandereteiras e a súa vida, non só ás homenaxeadas neste ano das Letras 2025, senón tamén as pandereteiras do país. Mediante dinámicas divulgativas, achegaranse ao público melodías, ritmos e a lingua das cantareiras. A música destas informantes é unha boa maneira de achegar a lingua galega aos asistentes”, sinala.
Blanco explica que “mediante dinámicas divulgativas achegaranse ao público melodías, ritmos e a lingua das cantareiras. A música destas informantes é unha boa maneira de achegar a lingua galega aos asistentes. É por iso que cremos que mediante este tipo de propostas estamos axudando á divulgación da nosa lingua e facer conscientes a poboación da importancia e da súa conservación poñendo de exemplo esta xeración de mulleres que foron quen de transmitir a lingua coas cántigas”, precisa.
Figura emerxente na música tradicional galega
Icía Varela é filóloga. É fundadora do grupo Arredores, co que publicou o disco “Ecdise” (2024). Subiu aos escenarios con SÉS, Mercedes Peón, Xabier Díaz, Caamaño&Ameixeiras, Fillas de Casandra ou Xosé Manuel Budiño. Como solista, actuou no Festival Intercéltico de Lorient (Francia) e no Celtic Connections de Glasgow (Escocia), sendo unha figura emerxente e con gran proxección na música tradicional galega.
Docente, investigador e dinamizador cultural
Xosé Manuel Varela é docente e fundador da Fundación Eduardo Pondal. Activo dinamizador de iniciativas culturais na Costa da Morte, Premio Bergantiños desde os Libros na súa edición do ano 2000. Publicou con Icía Varela “O grilo Míllelo” e “Cantareiras”.
