Concello de LALÍN

A concelleira de Educación, Begoña Blanco, visitou esta semana o CEIP “Varela Buxán” de Cercio para comprobar a evolución dos traballos que se executaron como melloras neste colexio do rural e que van redundar nunha mellora da calidade dos servizos para o conxunto da comunidade educativa e nunha maior comodidade no funcionamento do centro.

Uns traballos que consistiron na substitución do portal vello do pavillón por un portal completamente novo eléctrico; en botar unha capa de formigón á entrada do pavillón; na colocación de tarima antideslizante no comedor e tamén de tarima vinícola en cinco das aulas que que quedaban, de tal xeito que o solo do colexio queda completamente cuberto de tarima agás nos corredores. Así mesmo estas actuacións de mellora completáronse coa conversión dun baño en almacén de materiais de Infantil, explica Blanco, que incide en que todas elas foron consensuadas coa dirección do centro e coa Anpa.

A responsable local de Educación fai fincapé “no importante investimento realizado neste centro pois a estas melloras hai que lle engadir os traballos que realizamos o pasado ano de cubrición do patio do colexio e a construción dunha entrada lateral para acceso directo ao patio de xogo exterior”.

Por último avanza que “continuamos desenvolvendo actuacións de mantemento e mellora nos centros educativos ao longo de todo o ano, estando en contacto continuo con eles para atender ás súas necesidades”. Neste sentido anuncia que ao remate deste curso e antes de que comece o vindeiro, farase unha reunión coas direccións dos centros para ver as necesidades e as peticións que teñen de cara ao curso académico 2025-26.