-
Ofrece actividades e campamentos para a cativada de entre 3 e 17 anos de idade
-
O Campamento Verde celebrarase en dúas quendas e en horario de 9 a 14 horas para nenos de 4 a 12 anos
-
O Campamento Carballo celebrarase en dúas quendas en formato Campamento Urbano en horario de 9 a 14 horas para cativada de 8 a 12 anos
-
O Campamento Miúdo celebrarase en dúas quendas en formato de campamento urbano en horario de 16:00 a 20:00 horas para cativada de 3 a 6 anos
-
O Campamento no Mar será nas instalacións de A Espiñeira en Boiro para rapaces de 13 a 17 anos con pernoctación nesa instalación fronte ao mar
O concelleiro de Xuventude, Avelino Souto, vén de anunciar a apertura do prazo para a inscrición nos catro campamentos que o Concello programou para este verán como apoio á conciliación e como programación de ocio para a cativada. Un prazo que estará aberto dende as 08:00 h do luns 9 de xuño ata o venres 13 ás 15:00 h, inclusive, e na que os/as participantes serán elixidos por rigoroso orde de inscrición e ata completar as prazas dispoñibles. Unha inscrición que se poderá facer de xeito telemático na plataforma do Concello ou de xeito presencial nas instalacións municipais.
A oferta de campamentos para este verán 2025 será en tres formatos distintos. O Campamento Verde, centrado en temas medio ambientais, o Campamento Carballo e Campamento Miúdo que serán uns campamentos urbanos e o Campamento Castiñeiros que será para os cativos de máis idade e desenvolverá as súas actividades en Boiro, ao pé do mar.
CAMPAMENTO VERDE
O Campamento Verde centrarase en actividades medio ambientais e na natureza e celebrarase en dúas quendas semanais entre o 14 e o 28 de xullo: a primeira do 14 ao 18 de xullo e a segunda do 21 ao 28 de xullo. Serán cinco días de actividade por quenda en horario de 9 a 14 horas e terá como base o pavillón municipal. Está destinado a nenos de entre 4 e 12 anos de idade.
CAMPAMENTO MIÚDO
O Campamento Miúdo céntrase a modo de campamento urbano e terá lugar en dúas quendas. A primeira entre o 7 a 11 de xullo e a segunda entre o 14 e o 18 de xullo. Este campamento estará destinado a cativos entre 3 e 6 anos e celebrará as súas actividades entre as 16 e as 20 horas. Ten como sede o Espazo Xove.
CAMPAMENTO CARBALLOS
O Campamento Carballos celebrarase a modo de campamento urbano e terá lugar en dúas quendas tendo como sede o Espazo Xove. A primeira entre o 4 e o 11 de xullo e a segunda entre o 28 de xullo e o 4 de agosto. Este campamento estará destinado a cativos entre 8 e 12 anos e celebrará as súas actividades entre as 9 e as 14 horas.
CAMPAMENTO NO MAR
Por último, o Campamento no Mar ou tamén chamado Campamento Castiñeiros, celebrarase no campamento xuvenil “A Espiñeira” en Boiro. Nel poderán participar cativos de entre 13 e 17 anos de idades terá as actividades centradas no entorno mariño e nas actividades deportivas e de ocio na zona de costa. Terá lugar do 26 de agosto ao 4 de setembro.
Estes catro campamentos terán un prezo moderado e, en todo caso, inferior aos que presentan as actividades de conciliación de verán doutras administracións.
O prazo para inscribirse nestes campamentos será do 9 de xuño (ás 08:00 h) ao 13 de xuño (ás 15.00 h), ambos inclusive, e a data de resolución será o 23 de xuño.
CONCILIA LALÍN
Esta programación de conciliación complementa o servizo Concilia Lalín das vacacións de verán que comezará a funcionar o luns 23 de xuño e ata o 9 de setembro. O servizo desenvolverase de xeito centralizado no novo edificio sociocultural na rúa Manuel Rivero de xeito ininterrompido de 7.30 a 15.00 horas.
