Concello de LALÍN

A XVII Bienal Pintor Laxeiro, promovida polo Concello de Lalín, estará comisariada polo artista plástico e presidente da Real Academia Galega de Belas Artes (RAGBA), Manuel Quintana Martelo. As datas da exposición son desde principios de outubro ata finais de novembro, tal como se recolle na proposta que vén de ser aprobada en xunta de goberno.

O comisario indica que baixo o título “Paisaxe e sombra”, esta Bienal <propón unha viaxe a través dun contexto de construción da percepción da sombra, desde unha visión analítica da mesma, “a paisaxe” a unha formulación do volume a partir da “sombra”>. Tal como explica esta figura relevante no mundo das artes “a mostra establece un percorrido por artistas que interpretan a súa visión desde a subxectividade persoal de cada un deles”.

Os artistas que formarán parte da XVII Bienal serán 10 artistas de elevada proxección actual, conxugando homes e mulleres na súa selección. A relación de artistas é a seguinte:

• Mónica Alonso (Lugo)

• Bosco Caride (Vigo)

• Alfonso Galván (Madrid)

• Francisco Leiro (Madrid, Cambados)

• Concha Martínez Barreto (Madrid)

• Jorge Martins (Lisboa)

• Teresa Moro (Madrid)

• Manuel Quintana Martelo (Teo-A Coruña)

• Susanne Thelmitz (Lisboa)

• Carmen van der Lynden (Madrid)

Quintana Martelo remarca que “os artistas propostos para este certame fórmano unha selección daqueles que fixeron unha mostra no Museo MARCO de Vigo nos últimos cinco anos co que se conta coa colaboración do dito Museo e do seu director, Miguel Fernández-Cid, cuxa colaboración atinxe a axuda no comisariado e na escritura do texto para o catálogo”. “As distintas propostas de cada un dos artistas conforman un conxunto onde a percepción da imaxe se contextualiza nun contexto teórico sobre as dinámicas persoais sen deixar a mirada xeral fóra dunha interpretación complementaria entre eles”, explica o comisario.

Comisario, Manuel Quintana Martelo

Quintana estuda Pintura e Gravado na Facultade de Belas Artes Sant Jordi de Barcelona, Pintura Mural no Centro de Mural Contemporáneo de Sant Cugat do Vallés e Cine no Centro de Arte Cinematográfica de Barcelona.

Completa a súa formación con bolsas de estudos en entidades nacionais e estranxeiras. É catedrático de Debuxo de instituto de bacharelato e foi presidente da Asociación Galega de Artistas Visuais. En novembro de 2003 é elixido Académico de Número da Sección de Pintura da Real Academia Galega de Belas Artes Nosa Señora do Rosario, na que ingresa o 11 de xuño de 2004 cun discurso titulado “A Forma: Natureza do debuxo”. É presidente da Real Academia Galega de Ciencias desde 2014 e membro de Atlántica, ademais de Premio da Cultura de Galicia na modalidade de Artes Plásticas (2012), entre outros diversos recoñecementos.

Realizou exposicións individuais e colectivas en centros de todo o mundo, entre as que destacan as levadas a cabo no Museo de Arte Contemporánea de Eivissa, Museo Nacional de Santo Domingo, Museo Nacional de Belas Artes na República do Salvador ou no Hispanic Institute de Nova York ou na Berliner Liste en Berlín, e a súa obra foi exhibida internacionalmente en feiras de arte como ARCO.

Pintor, gravador e escultor, Manuel Quintana Martelo desenvolveu unha prolífica carreira artística con numerosas exposicións en prestixiosos museos e fundacións e grandes institucións contan nas súas coleccións con obras de Quintana Martelo como o CGAC, a colección do Parlamento de Galicia, o Gertrude Stein Collection en Nova Iorque, o Museé Villa de Medicis, La Péroone (Francia) ou a Biblioteca Nacional de España (Madrid).

A maiores de toda a súa traxectoria é un habitual colaborador do Concello de Lalín e do Museo Ramón Mª Aller. Foi cartelista da Feira do Cocido no ano 2006 e autor da exposición central da Feira do Cocido do ano 2023 titulada “Inside”. Realizou obras para a EmporcARTE e impartiu conferencias de gran calidade sobre o Día das Artes Galegas ademais de ser un gran colaborador no desenvolvemento do Ano Laxeiriano en 2022 e de apoiar coa súa presenza diversidade de actos culturais e institucionais no Concello de Lalín.

A Bienal Pintor Laxeiro naceu como un proxecto para fomentar as artes plásticas e promover a figura do recoñecido artista lalinense e foi medrando ata consolidarse como un evento de referencia, que vaia máis alá do plano artístico posto que tamén é unha iniciativa dinamizadora da vila. Ao longo das edicións anteriores esta cita serviu para dar visibilidade a artistas locais ou estatais e proxecto o nome de Lalín máis alá do ámbito galego. Na súa XVI edición estivo dedicada aos artistas da Vía da Prata con Lalín como punto de encontro. Cómpre destacar que é un proxecto continuo non tempo que non se interrompeu nin nos anos da pandemia.