Celébrase outro ano o peche do curso 2024-2025 das Aulas Sénior nas que participaron 120 persoas, cun acto de clausura e coa inauguración dunha mostra, actos abertos á participación da veciñanza e que terán lugar o vindeiro mércores 11 de xuño ás 17 h
A concelleira de Política Social, Carmen Canda, anuncia a fin das actividades impartidas por Ategal no curso 2024-2025: pintura ao óleo, acuarela, historia da arte e saídas culturais -a última foi ao Pazo de Meirás e a Betanzos o pasado 16 de maio-, manexo de smartphone e informática, estimulación cognitiva e inglés.
As clases de pintura ao óleo e acuarela tiveron lugar todos os martes de 10:00 a 11:30 e de 11:45 a 13:15, respectivamente no Espazo Activo de Lalín; historia da arte no Lalín Arena os martes de 17:30 a 19:00; manexo de smartphone e informática, diferenciado en dúas modalidades, todos os mércores de 10:30 a 11:30 e de 11:30 a 12:30, respectivamente, na Aula Cemit do Auditorio de Lalín; estimulación cognitiva con dous grupos todos os xoves de 16:00 a 17:30 e de 17:30 a 19:00 e inglés con dous grupos os venres no Espazo Xove de Lalín -Casa da Xuventude- 10:30 a 11:30 e de 11:30 a 12:30.
Estas actividades responden ás inquedanzas e necesidades actuais dunha xeración de persoas de 55 anos ou máis con ideas, experiencias, cultura e estilos de vida dinámicos e variados. Neste sentido a responsable municipal fai fincapé na importancia que ten fomentar as aprendizaxes nas aulas e o envellecemento activo da poboación lalinense.
As aulas pretenden contribuír a manter a autonomía e independencia das persoas máis maiores mediante distintas propostas e actividades, crear un espazo ocupacional tras a xubilación no que desenvolverse integramente como persoas e manter un acercamento cos ámbitos da actualidade. Durante o curso participaron nas actividades arredor de 120 persoas do Concello de Lalín, que manifestaron o seu desexo de continuidade de cara ao próximo curso.
