- Son obras realizadas durante o curso de pintura e acuarela polas persoas participantes nas distintas actividades de Ategal
- Péchase o curso 2024-2025 das actividades de pintura, acuarela, historia da arte, informática na súa modalidade de iniciación e avanzado, estimulación cognitiva, con dous grupos, e inglés nas dúas modalidades (iniciación e avanzado), actividades nas que participaron ao redor de 120 persoas
A concelleira de Política Social, Carmen Canda; a tenente alcalde, Paz Pérez; o director xeral de Maiores e Atención Sociosanitaria, Antón Acevedo; e a directora de Ategal, Paula Sande, anuncian a fin das actividades impartidas por Ategal no presente curso 2024-2025: pintura ao óleo, acuarela, historia da arte e saídas culturais -a última foi ao Pazo de Meirás e a Betanzos o pasado 16 de maio-, manexo de smartphone e informática, estimulación cognitiva e inglés, así como a continuidade das Aulas Sénior de Lalín para o próximo curso 2025-26. Así mesmo as autoridades puideron desfrutar das obras artísticas realizadas polo alumnado participante.
Estas actividades responden ás inquedanzas e necesidades actuais dunha xeración de persoas de 55 anos ou máis con ideas, experiencias, cultura e estilos de vida dinámicos e variados. Neste sentido a responsable municipal fai fincapé na importancia que ten fomentar as aprendizaxes nas aulas e o envellecemento activo da poboación lalinense.
As aulas pretenden contribuír a manter a autonomía e independencia das persoas máis maiores mediante distintas propostas e actividades, crear un espazo ocupacional tras a xubilación no que desenvolverse integramente como persoas e manter un acercamento cos ámbitos da actualidade. Durante o curso participaron nas actividades arredor de 120 persoas do Concello de Lalín, que manifestaron o seu desexo de continuidade de cara ao próximo curso.
A exposición poderase visitar ata o 30 de xuño en horario de 16 a 20 horas, de luns a venres.
