- Este descanso non repercutirá na atención de situacións de urxencia que poidan xurdir durante o verán, das que se ocuparía en todo caso persoal municipal
- Desde a Concellería de Política Social pídese que non se deixen doazóns de materiais na beirrarúa nin nos locais próximos ao Desván, dado que non poderán ser reutilizados
- No primeiro semestre de 2025 atendéronse 307 persoas a través dun cento de citas presenciais
- Agradécese a todas as persoas que achegaron as súas doazóns e ao equipo de voluntariado que de xeito continuo fixo posible a selección, clasificación e distribución dos materiais doados
Desde o xoves 10 de xullo e ata setembro o Desván municipal permanecerá pechado ao público por vacacións do persoal voluntario que atende o servizo. Esta situación non repercutirá na atención das situacións de urxencia que poidan xurdir durante o verán, das que se ocuparía o persoal municipal.
Desde a Concellería de Política Social infórmase que aquelas persoas que queiran achegar as súas doazóns deberán facelo estes días e ata o 10 de xullo, ben a través do colector colocado diante do local do Desván municipal (a este respecto recórdase que o volume das doazóns deben ter dimensións reducidas) ou ben de xeito presencial en horario de 10 a 13 horas martes e xoves.
Desde o dito departamento municipal pídese encarecidamente que se eviten depositar doazóns na beirrarúa ou nas inmediacións dos locais do Desván a partir do 10 de xullo, dado que todo o que se deposite de xeito inadecuado non poderá ser reutilizado.
Desde a Concellería agradécese un ano máis a colaboración do equipo de voluntariado que de modo continuado fixo posible a selección, clasificación e distribución de xenerosas doazóns recibidas pola poboación lalinense ao longo deste primeiro semestre, ademais da de todas as persoas que doaron. Grazas a este labor voluntario foi posible dar cobertura a necesidades, especialmente de roupa e calzado, de 307 persoas diferentes a través dun cento de citas presenciais.
