- Cómpre subliñar que o feito de desenvolver dous obradoiros ao mesmo tempo supón un gran esforzo municipal, xa que poucas poboacións galegas o poden asumir
- No obradoiro Sámago, que está chegado á súa fin, o alumnado de Albanelería realizou actuacións de acondicionamento en diversos edificios municipais e o de Forestais ocupouse do desbroce e mantemento do paseo Pontiñas, da delimitación da zona dos muíños cun valado e na construción dunha mesa e dun banco nesta zona, da retirada de troncos do río, da limpeza ante a caída de árbores por temporais e de desbroces e acondicionamento no entorno de varios centros sociais
- O alumnado de Amorea, que remata en outubro, está levando a xestión de almacéns municipais, un traballo que teñen bastante avanzado tanto na organización como no deseño de aplicacións correspondentes para cada un deles
O Concello de Lalín conta, neste momento, con trinta alumnos-as/traballadores-as no Centro Ocupacional que se están formando en 3 especialidades diferentes: unha especialidade no obradoiro de persoas mozas Amorea (“Xestión de Almacéns e aprovisionamento) e dúas especialidades no obradoiro dual de emprego Sámago (Albanelería e Forestais). O feito de estar os dous obradoiros ao mesmo tempo supón un gran esforzo por parte do Concello, xa que poucas poboacións galegas o poden asumir.
O obradoiro de emprego Sámago está chegando ao seu fin. Empezou no mes de decembro de 2024 e remata o 1 de setembro deste ano. Nestes meses unha parte do alumnado formouse a nivel teórico e práctico en “Operacións auxiliares de revestimentos continuos en construción”–(Albanelería) e outra en “Operacións auxiliares en conservación e mellora de montes”-(Forestais).
Ademais das prácticas previstas en cada un dos certificados de profesionalidade que están cursando, tamén levaron a cabo as obras establecidas no proxecto do obradoiro.
En Albanelería, fixéronse obras de acondicionamento no pavillón municipal, no Lalín Arena, e nos centros sociais de Donramiro, Donsión, Cercio e Rodís. Estase rematando o local social de A Xesta e iniciouse xa o de Cadrón.
As obras que se levaron a cabo foron sobre todo arranxo de humidades, picado, enlucido e pintado de paredes tanto interiores como exteriores. Tamén se levaron a cabo traballos de limpeza de canalóns e de tellados.
En Forestais, os traballos están centrados sobre todo no Paseo Pontiñas co desbroce e acondicionamento do mesmo. Nel tamén se acometeron traballos de reparación e substitución do valado perimetral. Acondicionouse o entorno dos muíños poñendo un valado para delimitar as zonas de acceso peonil e facendo unha pequena mesa e un banco. Para isto reutilizouse a madeira dunha ponte, situada na lagoa final do paseo, xa en desuso e que previamente se desmontou completamente por estar totalmente impracticable.
Outra actuación importante foi a retirada de troncos do río e actuacións rápidas de limpeza ante a caída de árbores por temporais.
Esta especialidade tamén fixo desbroces e acondicionamento no entorno de varios centros sociais nos que actuou a especialidade de Albanelería, como Cercio, Donsión, e proximamente Rodís.
Xestións de almacéns de xeito eficiente
Por outra banda, o programa de emprego para persoas mozas Amorea, cun ano de duración, rematará no mes de outubro. Este alumnado ademais da formación teórico práctica en “Xestión de almacén e aprovisionamento”, tamén está levando a cabo a obra prevista no seu proxecto. Remataron os almacéns do Auditorio Municipal e do Lalín Arena.
Neste momento continúan cos almacéns de Protección Civil, o Desván Municipal e o Concello de Lalín. En todos estes almacéns o traballo está bastante avanzado tanto na organización como no deseño das aplicacións correspondentes para cada un deles. Por exemplo, para Protección Civil o alumnado do obradoiro xeolocalizou todos os hidrantes do casco urbano para así facilitar a labor do equipo de Protección Civil no caso de ter que facer uso dos mesmos. Tamén deseñaron unha aplicación na que van poder levar un control de todo o equipo e material de traballo que levan en cada un dos camións. Deste xeito saberán en todo momento o que precisan repoñer ou cambiar en caso necesario. Do que se trata é de xestionar o almacén correspondente facendo que o traballo diario do persoal sexa moito mais sinxelo, práctico e efectivo.
