- As solicitudes poderán formalizarse desde o 15 de xullo e ata o 20 de agosto e faranse preferiblemente a través de sede electrónica
- O servizo dará comezo o 8 de setembro, coincidindo co inicio do novo curso escolar
O Servizo Concilia Lalín, cun enfoque lúdico-educativo está dirixido a menores de 3 a 12 anos, para facilitar a conciliación da vida familiar, persoal e laboral, e desenvólvese baixo dúas modalidades.
Durante o período lectivo, funciona ininterrompidamente ao longo do ano nos seguintes centros educativos: CEIP Manuel Rivero de Lalín, CEIP Xoaquín Loriga de Prado e CEIP Vicente Arias de la Maza de Vilatuxe, proporcionando actividades de acollida, atención e lecer, durante as horas previas e posteriores á xornada escolar, e durante o período vacacional (Entroido, Semana Santa, Verán e Nadal) desenvólvese de xeito centralizado no edificio sociocultural na rúa Manuel Rivero.
O prazo de presentación de solicitudes está aberto ao longo de todo o ano pero para unha mellor organización do servizo, ábrese un prazo de presentación de solicitudes para o período lectivo 2025-2026 dende o 15 de xullo ata o 20 de agosto.
O Servizo Concilia Lalín Lectivo, empezará o día 8 de setembro coincidindo co inicio do novo curso escolar.
A presentación de solicitudes farase preferiblemente a través da sede electrónica do Concello de Lalín, presentando a solicitude e xuntando a documentación requirida que xa aparece recollida na propia instancia, de non ser posible, presentarase no Rexistro Xeral do Concello.
As e os menores participantes deberán levar unha merenda saudable.
Para máis información contactar coa Oficina de Igualdade, nos teléfonos 986 78 70 60 e 986 18 10 45 ou en igualdade@lalin.gal e no correo electrónico concilia@grupovitae.com
