Onte presentouse oficialmente a sexta edición do Galicia Clarinet Fest, que se celebrará en Lalín do 28 de xullo ao 1 de agosto, consolidándose como un dos encontros de referencia para clarinetistas a nivel estatal e internacional.
No acto de presentación, celebrado no Concello de Lalín, participaron José Crespo Iglesias, alcalde de Lalín; María Isabel Couselo Torres, directora territorial da Consellería de Cultura, Lingua e Xuventude en Pontevedra; Jorge Cubela, en representación da Deputación de Pontevedra; Begoña Blanco, concelleira de Cultura de Lalín; e Xocas Meijide, director artístico do festival, que avanzou que o Galicia Clarinet Fest, de carácer gratuíto, trae este ano a Lalín unha programación de altísimo nivel na que haberá desde concertos de cámara, ensemble, a actuación de Gorka Hermoso, un dos mellores acordeonistas europeos e Edurne Zabalo, o concerto da Real Filharmonía de Galicia ou o sorprendente espectáculo audiovisual Sonoro infinito, de Manuel Martínez.
A programación musical volve á rúa, e ofrece un total de 12 concertos que se desenvolverán diariamente tanto nas Praza das Pipas, en dobre sesión ás 13 e 21 horas, como no Auditorio de Lalín. Xocas Meijide salientou a importancia da parte académica, que acollerá a alumnado procedente de países como EEUU, Canadá, Francia, Suiza, Reino Unido… así como de distintos puntos da xeografía española, destacando ao profesorado formado por sete clarinetistas de prestixio internacional.
Durante a súa intervención, Jorge Cubela destacou a importancia de que un concello das dimensións de Lalín, situado no rural, acolla un evento como o Galicia Clarinet Fest que pon a Lalín no mapa da elite cultural.
Pola súa banda, o alcalde José Crespo subliñou o compromiso do Concello coa música e coa dinamización cultural do territorio, agradecendo o apoio tanto da Xunta de Galicia como da Deputación de Pontevedra. Crespo salientou a importancia de Lalín ao acoller un evento de renome internacional, que descentraliza a programación cultural deste nivel que habitualmente se celebra nas grandes cidades, e que vai converter Lalín na capital do clarinete.
A colaboración entre as administración fai posible, segundo apuntou Mª Isabel Couselo, representante da Xunta de Galicia, que un festival que reúne a clarinetistas de tanto prestixio, se poida celebrar en Lalín, manifesta o compromiso da Xunta de Galicia coa formación, e animou a que a xente que aínda non coñece o festival se achegue a Lalín.
O Galicia Clarinet Fest 2025, que converte un ano máis a vila de Lalín nun punto de encontro para amantes de música, especialmente do clarinete, contará ademais en cada un dos concertos coas actuacións de Viravolta Títeres e Celso Fernández Sanmartín.
O domingo 27 de xullo terá lugar un concerto de benvida para o alumnado do festival coa actuación da Galicia Bass Clarinet Ensemble ás 20.30 horas na praza da Pipas.
O festival conta co patrocinio da Xunta de Galicia, Deputación de Pontevedra e o Concello de Lalín.
