- A contía das axudas será por importe único de 100 euros por alumno/a matriculado/a
- Onte saíu publicado no BOPPO o extracto de bases que establece que o prazo de presentación de solicitude será de vinte días naturais desde o día seguinte ao da publicación do dito extracto, é dicir, pódense pedir ata o 11 de agosto, inclusive
Desde hoxe, 22 de xullo, e ata o vindeiro 11 de agosto, inclusive, pódense solicitar as bolsas complementarias ao estudo para alumnos/as de centros docentes do Concello de Lalín para o vindeiro curso 2025-2026, ás que o goberno destina un investimento total de 30.000 euros, de acordo ao extracto de bases que hoxe aparece no BOPPO.
Esta orde de axudas está destinada a familias empadroadas no Concello de Lalín e integradas por alumnado matriculado, durante o curso escolar 2025-2026, en centros docentes públicos e privados concertados no municipio para o acceso ao materia escolar, deportivo, calzado e roupa.
A concelleira de Política Social, Carmen Canda, sinala que “a tipoloxía de axudas ao abeiro desta convocatoria inclúe: libros de texto, materia escolar funxible (cadernos, folios, cortes, lapis, bolígrafos, carpetas, tinta de impresora...), materia complementario (compás, estoxo, regras, mochilas, libros de lectura, memoria usb...), material deportivo (chándal, tenis, camisetas, calcetíns...), roupa de abrigo e calzado. A contía das bolsas será por un importe único de 100 euros por alumno/a matriculado/a.
As ensinanzas ás que se dirixe este programa son: segundo ciclo de Educación Infantil; Educación Primaria; Educación Secundaria Obrigatoria e ciclos formativos de grao básico.
A finalidade destas axudas é facer efectivo o principio de igualdade no exercicio do dereito á educación e compensar a aquelas familias que polas súas condicións económicas presenten maiores dificultades para afrontar os gastos derivados da escolarización dos/das seus/súas fillos/as, promovendo así accións que contribúan ao benestar social, paliando as diferenzas sociais e os riscos de exclusión social e favorecendo a integración das nenos e nenos no sistema educativo.
A Xunta de Goberno Local resolverá o expediente de concesión de bolsas, previo informe da intervención municipal. O prazo máximo para resolver e notifica a resolución do procedemento non poderá exceder dos 6 meses contados desde a data do acordo de aprobación de bases.
