Anuncia que Avelino Souto terá baixo a súa responsabilidade as áreas de Política Social (con sección específica dedicada á Infancia) e Igualdade, Xuventude e voceiro de Goberno; Carmen Canda será a responsable das áreas de Muller (CIM), Cemiterios e Envellecemento Activo, e Noelia Seijas encargarase de Sanidade e Deportes
Con este axuste organizativo, ademais de optimizar a atención diaria en servizos sociais, créase unha nova área dedicada ao Envellecemento Activo, refórzase Vivenda, Industria, as áreas parroquiais na Axenda Urbana, Infancia e Cemiterios
O alcalde de Lalín, José Crespo, anuncia que “neste ecuador de mandato quero facer unha pequena modificación no organigrama do goberno porque entendo que algunhas áreas como servizos sociais, polas súas particularidades, debe levalos unha persoa que teña dedicación no Concello porque necesita atención diaria permanente”.
Neste sentido explica Crespo que “polo tanto, o que fago é unha pequena redistribución de competencias, que é a seguinte”:
-Avelino Souto: áreas de Política Social (sección específica de Infancia) e Igualdade, Xuventude e voceiro do Goberno
-Carmen Canda: áreas de Muller (CIM), Cemiterios e Envellecemento Activo
-Noelia Seijas: áreas de Sanidade e Deportes
Crespo explica que “con esta redistribución, ademais de optimizar a atención diaria en servizos sociais, reforzamos as áreas de”:
-Vivenda: “queremos dotar a esta Concellería, que xa existe, de personalidade propia, mediante a creación dunha sección específica que se ocupe de todas as políticas relacionadas coa vivenda como un dos eixos estratéxicos do mandato. Esta área seguiraa levando, como ata o de agora, o concelleiro Pablo Areán, pero pretendemos darlle un novo impulso”, afirma.
-Industria: “reforzamos a Concellería de Promoción Económica adscrita a Beatriz Canda mediante a creación dunha sección específica dedicada á todo o que ten que ver con Industria”, subliña. Neste sentido fai fincapé que “a raíz, sobre todo, da última reunión mantida coa conselleira de Economía e Industria serán diversas e claves as actuacións que haxa que desenvolver con este departamento autonómico, por iso se trata de ter unha concelleira que se ocupe especificamente das relacións con esta Consellería”.
-Axenda Urbana: “dentro da Axenda Urbana imos acometer un reforzo específico das áreas parroquiais”, competencia baixo a responsabilidade de Paz Pérez.
-Infancia: “dentro das políticas sociais que recaen sobre Avelino Souto tamén se creará unha sección específica para a infancia”.
-Cemiterios: “esta área será un dos retos que me marquei para este mandato para que os dous cemiterios queden funcionando perfectamente. Ao respecto remarca que “o Concello de Lalín necesita poñer en marcha os novos nichos e ao mesmo tempo a xestión dos dous cemiterios municipais para poder telos en perfecto estado de revista”. “Trátase dun reto que me marquei para este mandato e, polo tanto, voulle pedir a Carmen Canda que a súa dedicación, aínda que non a ten exclusiva, se centre na posta da nova fase do cemiterio de Fraga do Alén e mais do cemiterio vello, ao que hai que darlle un arranxo, e que as compaxine coas de Muller (CIM) e Envellecemento Activo”, sinala.
A maiores do reforzo das anteditas áreas, o rexedor explica que se crea, na Concellería que dirixe Carmen Canda, unha nova área de:
-Envellecemento Activo: “para potenciar todas as políticas que teñen que ver coas persoas maiores (Lalín Activa, de Ategal, convenio coa Universidade de Vigo para o desenvolvemento de actividades formativas para persoas maiores... en resume, todas actividades que teñan que ver tanto no rural como no urbano coas actividades dirixidas ás persoas maiores)”.
