A mostra, que se desenvolve no marco da programación municipal Lalín con Arte, pode visitarse ata o 1 de setembro no Museo Municipal Ramón María Aller
O artista afonda nas múltiples representacións do ceo (nubes, voos de paxaros, avións, cometas, auroras boreais, estrelas, constelacións e galaxias) a través da pintura, o debuxo, a fotografía e a montaxe e establecendo unha conexión simbólica con Joaquín Loriga, Laxeiro e Ramón María Aller
??????O xoves, 31 de xullo, ás 20:00 horas terá lugar no Museo Municipal Ramón María Aller de Lalín a inauguración da exposición “A través do ar”, do pintor compostelán Nolo Suárez, no marco da programación municipal Lalín con Arte.
A exposición reúne unha escolma de preto de 25 obras realizadas en técnicas diversas —pintura, debuxo, fotografía e montaxe— cun fío condutor común: o elemento do aire, na que afonda nas múltiples representacións do ceo: nubes, voo dos paxaros, avións, cometas, auroras boreais, estrelas, constelacións e galaxias. Das 25 obras, 22 son inéditas e, polo tanto, feitas polo artista de feito específico para esta exposición. Esta proposta forma parte dun proxecto máis amplo do autor arredor dos catro elementos primordiais da natureza.
A través de obras como Espiral no ar, Mirando as estrelas, O Astrónomo, ou as pezas da montaxe Das Galaxias e Nebulosas, o artista explora a dimensión estética e emocional do ceo, sempre combinando elementos figurativos e abstractos, cunha mirada sensorial e poética. Esta mostra ofrece ao público unha experiencia visual rica e diversa, froito da observación, a lectura, a reflexión e a experimentación pictórica.
O Museo Ramón María Aller, sede desta exposición, resulta un espazo especialmente significativo en relación coa temática das obras, por tratarse da casa natal do prestixioso astrónomo Ramón María Aller. O propio Nolo Suárez salienta tamén a conexión simbólica con Joaquín Loriga, pioneiro da aviación española e fillo ilustre de Lalín (o Concello traballa nunha comisión aberta a novas incorporacións nos actos de centenario do voo Madrid-Manila e do centenario da súa morte e da aterraxe no Toxo), e con Laxeiro, referente pictórico e mestre de artistas, entre os que el mesmo se inclúe.
Esta mostra poderá visitarse ata o 1 de setembro e está promovida polo Concello de Lalín, que seleccionou ao artista para esta ocasión pola coherencia do seu proxecto co espazo museístico e a súa traxectoria consolidada dentro da arte galega contemporánea.
Cunha ampla traxectoria expositiva en museos e galerías de Galicia, Madrid, Lisboa e Valencia, e unha presenza constante en mostras colectivas e itinerantes, Nolo Suárez é unha figura consolidada no panorama artístico galego contemporáneo. As súas obras forman parte de coleccións públicas e privadas, e teñen sido obxecto de análise por parte de críticos e escritores.
A exposición “A través do ar” constitúe unha oportunidade para achegarse ao universo plástico de Nolo Suárez, e para reflexionar sobre o ceo como territorio de beleza e imaxinación.
