O alcalde de Lalín visitou estes días as parroquias de Sello, co edil de Obras, e da Xesta, coa tenente de alcalde e coa concelleira de zona, nas que comprobou o remate das obras de mellora destes espazos comunitarios
Con estas actuacións os dous centros comunitarios quedan perfectamente acondicionados para o uso veciñal
O goberno vén de rematar as actuacións de reposición integral dunha parte da cuberta do centro social Sello e a renovación da cuberta no local social da Xesta, no que tamén se avanza no acondicionamento do seu interior. En ambos casos os tellados destes dous locais sociais foran danados polo temporal “Martiño”, polo que o executivo acometeu as obras por emerxencia.
Unhas actuacións, as levadas a cabo nestas dúas parroquias, que estes días visitou o alcalde de Lalín, José Crespo, co edil de Obras, José Cuñarro Torres, no caso de Sello, e coa tenente alcalde, Paz Pérez, e a concelleira de zona, Beatriz Canda, no caso da Xesta, cando asistiron o pasado domingo a unha conferencia sobre xenealoxía da parroquia da Xesta ofrecida polo lalinense Manuel Guerreiro e á inauguración dunha exposición de árbores xenealóxicas das familias da parroquia.
En Sello repúxose integralmente a cuberta dun dos espazos do centro social, concretamente o máis afastado da entrada do recinto e cuxo tellado fora totalmente destruído polo temporal, explica Crespo. Con esta actuación repárase a totalidade da cuberta e quedará en perfecto orde de revista, afirma.
No caso do local social da Xesta acometeuse a reparación da estrutura superior do edificio, coa retirada da cubrición anterior e a instalación dunha nova, con tellas e materiais de illamento, sinala o rexedor.
Tamén indica que están moi avanzadas as obras de acondicionamento no interior do centro social. Unhas actuacións que acomete o alumnado da especialidade de Albanelería do obradoiro de emprego Sámago que consisten no revestimento e pintado de paredes tanto interiores como exteriores, limpeza de baixantes e arranxo de humidades, sinala. Con estas intervencións os veciños teñen á súa disposición un centro social complemente renovado e listo para o seu uso, remarca.
