- “A nosa idea é que, cando remate este mandato, estean executadas as melloras solicitadas, que van redundar na mellora da mobilidade, nos desprazamentos e na estética deste entorno, de acordo co que pactamos cos veciños”
O alcalde de Lalín, José Crespo, acompañado polos concelleiros de Obras, José Cuñarro, e de Urbanismo, Pablo Areán, visitou este sábado a zona de Villa Flores, aproveitando a tranquilidade da ponte e que hai menos actividade que un fin de semanas normal para conversar cos veciños e anunciar que se vai a proceder a encargar a redacción do proxecto definitivo de mellora do entorno desta zona lalinense.
O plan contemplará a reordenación de rúas que pasarán a ser de dirección única, a reparación do firme, a mellora do alumeado público e outras actuacións que xa foran solicitadas polos veciños ao inicio do mandato.
“A nosa idea é que, cando remate este mandato, estean executadas as melloras solicitadas, que van redundar na mellora da mobilidade, nos desprazamentos e na estética deste entorno, de acordo co que pactamos cos veciños”, sinalou o rexedor.
En canto á reorganización viaria, Crespo explicou que Villa Flores contará cunha dirección única, de xeito que a entrada será pola rúa do Rodo —na parte superior, próxima á rotonda da estrada de Brántega— e a saída realizarase pola parte baixa. “Non hai forma de manter as dúas direccións co estreitas que son os viarios”, apuntou.
O proxecto tamén prevé dotar as rúas dun novo firme e estudarán solucións técnicas debido ás rasantes complicadas nas entradas ás vivendas. Antes de proceder á licitación, o Concello presentará a proposta definitiva aos veciños nunha reunión para consensuar as actuacións e aclarar as adaptacións necesarias nas entradas particulares.
Por outra banda, Crespo avanzou que o Goberno local esta traballando para resolver a situación da urbanización da Viuda, colindante con Villa Flores. Esta zona arrastra problemas desde a desaparición da promotora do Plan Parcial. Con anterioridade “á execución das melloras estea xestionada a entrega da urbanización da Viuda, para que quede resolta a curto prazo a problemática desas vivendas e a súa conexión con Villa Flores”, subliñou o alcalde.
Finalmente, Crespo agradeceu o traballo do concelleiro de Urbanismo, Pablo Areán, destacando a súa dedicación neste asunto, “agora xa se ve a luz ao final do túnel e o que temos é que intentar que o Sareb cumpra co prometido para poder rematar os edificios”.
