- A concelleira de Cultura, Begoña Blanco, presenta a programación de setembro
Mércores, 27 de agosto de 2025
As Festas das Dores, que se celebrarán do 19 ao 23 de setembro, coparán unha significativa parte das actividades previstas para o vindeiro mes cun cartel no que se está traballando nos últimos detalles e que se dará a coñecer proximamente. Así o afirma a concelleira de Cultura, Begoña Blanco, que avanza que en setembro, a programación tamén abranguerá a I Mostra de Arte de Lalín na rúa, unha nova iniciativa coa que amosar a creatividade local que se desenvolverá durante as Festas das Dores; actividades do programa de dinamización lectora do programa “Ler conta moito” a fin de incentivar o hábito lector entre as xeracións máis novas; o festival cultural Algarabía que combina concertos, obradoiros e instalacións artísticas no que o Concello colabora; concertos de bandas na rúa, neste caso, da Banda de Vilatuxe, e teatro da man do espectáculo “A serie Clopen”, no marco do programa de mobilidade do Centro Dramático Galego.
Blanco anuncia que abrirá a programación de setembro o programa “Ler conta moito” cunha actividade o xoves 4 de setembro titulada “Imos bailar un conto”, a cargo de Anxo Moure e que se desenvolverá na Biblioteca Varela Jácome a partir das 18.30 horas.
A responsable municipal de Cultura remarca que “Ler conta moito” é programa de dinamización lectora, promovido polo Concello de Lalín en colaboración coa Xunta, que inclúe nesta edición diferentes actividades atractivas orientadas a diferentes idades (desde 0 a 12 anos) que se desenvolverán na Biblioteca Municipal “Varela Jácome” durante o mes de setembro e tamén en outubro, coas que se trata de incentivar o hábito lector entre as xeracións máis novas, ao tempo que facer da Biblioteca un espazo dinámico e acolledor para pasar as tardes a cativada mediante un achegamento ao mundo da lectura.
Así o sinala a concelleira de Cultura e Educación, Begoña Blanco, que subliña que “Ler conta moito” trata de achegarlle á cativada a lectura e a información dun xeito lúdico e atraente, ao tempo que se reforza o carácter das bibliotecas como espazo de relación, aberto, participativo e facilitador da aprendizaxe permanente.
A actividade do 4 de setembro, “Imos bailar un conto” de Anxo Moure, é unha proposta orientada a un público familiar na que as bibliotecas son bosques, xa que un día os libros foron árbores. Narra a historia de Zapatiños de Cartón, o avó do Carballo con Botas, cando chega á biblioteca portando unha carta dos bosques para que nenos e nenas aprendan a camiñar polas historias para coidar da terra que gardan os libros. A duración do espectáculo son 50 minutos. A duración da actividade é de 50 minutos.
Do 5 ao 7 de setembro desenvolverase a Algarabía, promovida pola Asociación Cultural O Naranxo e que conta coa colaboración do Concello, con propostas que combinan música, xogos, obradoiros e instalacións artísticas para fomentar o talento local. Os concertos no marco deste festival terán lugar na Praza da Torre: o venres 5 e o sábado 6 ás 20 h e o domingo 7 ás 13 horas.
O sábado 5 de setembro terá lugar ás 19 h un concerto da Banda de Vilatuxe na Avenida Luis González Taboada, que será o último do ciclo de Concertos das nosas Bandas de Música nas rúas, no que tocaron todas as formacións bandísticas lalinenses ao longo do verán en distintos espazos do pobo.
“Ler conta moito” continúa o xoves 18 de setembro coa actividade “Carabranca”, de Iria Piñeiro, ás 18.30 h na Biblioteca Varela Jácome. É un espectáculo orientado a público familiar, duns 40 minutos de duración, que trata sobre aventuras de superación e valores sobre a igualdade. Carabranca é unha nena pirata que logra todo o que se propón, desafiando calquera perigo marítimo ou terrestre. A partir do teatro de obxectos, a actriz conta unha historia na que se entrelazan as aventuras co ánimo de superación e de incentivar valores que fomentan a igualdade.
As Festas das Dores, que se celebrarán do 19 ao 23 de setembro, e cuxo cartel se presentará proximamente, abranguen como unha das novidades a I Mostra de Arte de Lalín na Rúa, que se desenvolverá na rúa Principal e no km0, o sábado e o domingo das Festas, é dicir, o 20 e o 21 de setembro, en horario de 12 a 14 e de 16 a 21 h. Como xa se explicou hai unhas semanas, afirma Begoña Blanco, con esta iniciativa trátase de darlle visibilidade aos creadores locais achegando á obra á veciñanza en días de máxima afluencia de persoas en Lalín e de dinamizar a vila con actividades no eido cultural durante os días festivos.
O venres, 26 de setembro, os lalinenses poderán desfrutar dun espectáculo teatral a través dunha nova edición do programa de mobilidade do Centro Dramático Galego. Trátase da obra “A serie Clopen” e a función, recomendada para todos os públicos, terá lugar no Salón Teatro de Santiago de Compostela. Todas as persoas que desexen asistir terán ao seu dispor un servizo gratuíto de autobús ata completar as prazas ofertadas para asistir á función, con entradas a 5 euros. O autobús sairá ás 15.45 horas da Praza do Concello e prégase máxima puntualidade. A función terá lugar ás 18 h no Salón Teatro de Santiago e a hora de saída tras a función para regresar a Lalín será ás 20.15 horas. As inscricións deben facerse no teléfono 986787060 reservando praza mediante pago previo de 5 euros ata o 24 de setembro.
“A serie Clopen”, con dirección de Pablo Reboleiro e dramaturxia de Clara Gayo e Pablo Reboleiro, é unha produción onde se ven acrobacias imposibles, aéreos impactantes, comedia hilarante, danza, clown e unha historia cativadora. É un espectáculo multidisciplinar que reflexiona, en ton de humor, sobre os retos que ten que afrontar a xuventude nestes tempos de incerteza.
