- O Centro de Información á Muller, servizo municipal da Concellería de Muller, activo no Concello de Lalín desde 2002 e conveniado na prestación de servizos con Agolada e Rodeiro desde 2014, ofrece atención ás vítimas de violencia de xénero, asesoramento xurídico, atención psicolóxica e información sobre os recursos dispoñibles
- Entre as próximas accións que levará adiante este servizo atópanse a convocatoria da Mesa Local de Coordinación fronte a Violencia de Xénero e unha nova edición do curso de defensa persoal, ambas actividades está previsto que se desenvolvan no vindeiro mes de outubro
- Nos primeiros oito meses de ano levou adiante importantes e diferentes iniciativas como un curso de defensa persoal feminina, unha reunión da Mesa Local de Coordinación fronte a violencia de xénero e a presentación do “Protocolo de actuación fronte ás violencias sexuais e LGTBIFóbicas no ocio nocturno”
- Ao longo do ano o CIM mantén tamén unha serie de actividades conmemorativas en relación ao 8 de Marzo e ao 25 de Novembro, así como programas formativos e educativos dirixidos ao alumnado e á poboación en xeral
- Mediante convenio co servizo ATENPRO da Cruz Roja, o CIM tramita as solicitudes de teleasistencia e mantense en colaboración co punto habilitado no posto da Garda Civil de Lalín de seguimento de casos de violencia de xénero, levando a cabo unha actuación de recursos en canto a vítimas de violencia de xénero
O Centro de Información á Muller (CIM) é un servizo municipal da Concellería de Muller que dirixe Carmen Canda, activo desde agosto de 2002 e conveniado na prestación de servizos cos concellos de Agolada e Rodeiro desde o 2014.
Este servizo ofrece, de xeito permanente, os recursos desde os que se artella unha intervención global dirixida ás mulleres en situación de vulnerabilidade, en horario de luns a venres de 8 a 15 horas e que proporciona asesoramento xurídico, atención psicolóxica, prioridade na intervención e atención a mulleres vítimas de violencia de xénero e información sobre os recursos dispoñibles na Comunidade Autónoma.
O CIM leva atendidas no que vai de ano un total de 372 consultas, desagregadas do seguinte xeito:
| TIPO DE CONSULTAS | Nº |
| Atención a vítimas de violencia de xénero | 117 |
| Asesoramento xurídico | 100 |
| Atención psicolóxica | 118 |
| Información de recursos, outro tipo de consultas | 37 |
| TOTAL | 372 |
Cómpre destacar que o número de consultas de atención ás vítimas segue a ser unha constante no traballo do CIM.
Próximas accións
Dentro das funcións do servizo do CIM e como vindeiras accións está previsto para o mes de outubro convocar a Mesa Local de Coordinación fronte a Violencia de Xénero, na que participan diferentes profesionais implicados na atención ás vítimas, de distintos departamentos como Policía Local, Xulgado, Colexio de Avogados, Garda Civil, IES, Subdelegación do Goberno e Dirección Xeral da Loita contra a violencia de xénero da Xunta. No marco desta Mesa lévanse a cabo actuacións de coordinación e supervisión na atención directa a vítimas de violencia de xénero.
Así mesmo o CIM ten concedida unha nova edición do curso de defensa persoal feminina para levalo a cabo tamén no mes de outubro. Está dirixido a mulleres adultas e está financiado pola Consellería de Política Social e Igualdade en colaboración coa Fegamp e inclúese dentro das actividades ofertadas ás entidades locais que forman parte da rede galega de concellos contra a violencia de xénero.
Actividades nos primeiros oito meses de 2025
Entre as accións desenvoltas nos oito primeiros meses de ano 2025 hai que destacar, ademais de todas as consultas atendidas, que o CIM, e dentro das funcións que presta, desenvolveu unha intensa axenda de actividades significativas, de diferente índole, todas elas co nexo común de ofrecer unha resposta global na atención ás vítimas de violencia de xénero:
- O 11 de xaneiro realizouse unha edición do curso de “defensa persoal feminina” nas instalacións do Lalín Arena no que tomaron parte 20 mulleres adultas.
- O 13 de xaneiro levouse a cabo a Mesa Local de Coordinación fronte á violencia de xénero, que se reúne con periodicidade e cuxa vindeira reunión será en outubro, como se vén de anunciar.
- O 4 de febreiro tivo lugar a presentación do “Protocolo de actuación fronte ás violencias sexuais e LGTBIFóbicas no ocio nocturno” por parte do director xeral da Loita contra a violencia de xénero, Roberto Barba, na que participaron diferentes hostaleiros coa finalidade de adherirse ao mesmo.
Ao longo do ano o CIM mantén unha serie de actividades conmemorativas en relación ao 8 de Marzo e ao 25 de Novembro, así como programas formativos e educativos dirixidos a alumnado e poboación en xeral a través do departamento de Igualdade municipal.
Por outro lado, o CIM está adscrito mediante convenio de colaboración ao servizo ATENPRO (Atención e protección para vítimas de violencia de xénero) da Cruz Roja Española. Desde o CIM tramítanse as solicitudes para a teleasistencia e mantense colaboración e coordinación constante co punto habilitado no posto da Garda Civil de Lalín de seguimento de casos de violencia de xénero, levando a cabo unha actuación global de recursos en canto a vítimas de violencia de xénero.
