No marco dos “Meses Temáticos” da Biblioteca, setembro é o Mes da Biblioteca e da Lectura, que se celebrará con distintas actividades como:
-unha exposición de materiais bibliográficos na Biblioteca, que xa se pode visitar e que estará durante o mes de setembro (achéganse fotos)
-dúas sesións do programa “Ler conta moito” que se desenvolverán o xoves 4 e o xoves 18, ás 18.30 h (achéganse carteis)
“Ler conta moito” é programa de dinamización lectora, promovido polo Concello de Lalín en colaboración coa Xunta, que inclúe nesta edición diferentes actividades atractivas orientadas a diferentes idades (desde 0 a 12 anos) que se desenvolverán na Biblioteca Municipal “Varela Jácome” durante o mes de setembro e tamén en outubro, coas que se trata de incentivar o hábito lector entre as xeracións máis novas, ao tempo que facer da Biblioteca un espazo dinámico e acolledor para pasar as tardes a cativada mediante un achegamento ao mundo da lectura.
A actividade do 4 de setembro, “Imos bailar un conto” de Anxo Moure, é unha proposta orientada a un público familiar na que as bibliotecas son bosques, xa que un día os libros foron árbores. Narra a historia de Zapatiños de Cartón, o avó do Carballo con Botas, cando chega á biblioteca portando unha carta dos bosques para que nenos e nenas aprendan a camiñar polas historias para coidar da terra que gardan os libros. A duración do espectáculo son 50 minutos. A duración da actividade é de 50 minutos.
A sesión do xoves 18 de setembro de “Ler conta moito” abranguerá a actividade “Carabranca”, de Iria Piñeiro, ás 18.30 h na Biblioteca Varela Jácome. É un espectáculo orientado a público familiar, duns 40 minutos de duración, que trata sobre aventuras de superación e valores sobre a igualdade. Carabranca é unha nena pirata que logra todo o que se propón, desafiando calquera perigo marítimo ou terrestre. A partir do teatro de obxectos, a actriz conta unha historia na que se entrelazan as aventuras co ánimo de superación e de incentivar valores que fomentan a igualdade.
