- Cortes e restricións en varias rúas do casco urbano para acoller os concertos, atraccións e actos relixiosos
- Dispositivo reforzado de seguridade con Policía Local, Garda Civil, Bombeiros, Protección Civil e ambulancias
O edil de Seguridade Cidadán, Pablo Areán, indicou hoxe que a celebración das festas patronais de Lalín obriga a elaborar un plan de tráfico especial que facilite a celebración dos diferentes eventos e espectáculos en adecuadas condicións de orde e seguridade, máxime cando as actuacións repartiranse por todo o casco urbano, o que implica maior complexidade á hora de organizar e coordinar os peches das rúas.
O Regueiriño volverá ser a zona onde se instalarán as atraccións, cunha distribución renovada para mellorar a seguridade e facilitar a organización. As atraccións comezarán a instalarse a partir do martes 16 de setembro, polo que desde ese día haberá restricións no estacionamento e na circulación ata o remate dos festexos.
O venres 19, a partir das 16:00 horas, pecharanse as rúas Rosalía de Castro e Joaquín Loriga, que permanecerán cortadas ata o mércores pola mañá. Este peche permitirá dispoñer do entorno do km0 e da Praza da Igrexa para o pregón, o chupinazo e o concerto de Tributo Sabinero. Tamén se pechará o tramo da rúa Nuno Eanes de Cercio entre Pintor Laxeiro e Maruja Gutiérrez para a montaxe do palco da Orquesta América de Vigo.
O sábado 20, a rúa Luis González Taboada pecharase antes das 13:00 horas entre o acceso ao Parking Europa e Pintor Laxeiro para o concerto da Banda de Música A Lira de Prado na Praza da Vila. Este peche repetirase pola tarde para o segundo concerto da mesma banda. Ás 18:00 celebrarase un pasarrúas de bandas de gaitas, e ás 18:45 pecharase a Praza de Loriga para o Festival de Gaitas. Os concertos de La Guardia e do Bailalín Festival non precisarán peches específicos, pero pola noite pecharanse as rúas Molinera e Luis González Taboada por seguridade.
O domingo 21 terá lugar a misa na honra da Virxe das Dores e a tradicional procesión polas rúas Joaquín Loriga, Molinera, Ramón Aller e Colón. Ás 13:00 pecharase de novo a rúa Luis González Taboada para o concerto da Banda de Lalín. Pola tarde, esta mesma rúa pecharase para a montaxe do palco do concerto de Susi Q’s, que permanecerá instalado para os DJ’s dos días seguintes. Este peche afectará tamén á rúa Maruja Gutiérrez, restrinxida só para residentes entre a rúa B e Luis González Taboada, e ao tramo ata Vidal Abascal, restrinxido para estacionamento e residentes.
O concerto nocturno da Banda de Lalín & The Maravillosos Tenors celebrarase na Praza de Loriga, que se pechará desde a mañá para a montaxe do palco. Isto obrigará a restrinxir o tráfico desde a fonte dos cabalos e pechar a rúa Ramón Aller desde a rúa do Observatorio. Ás 00:00 terá lugar o espectáculo pirotécnico no entorno do Lago do Pontiñas, que obrigará ao peche da rúa Arenal, do tramo inmediato da Rolda e ao perímetro do entorno do auditorio. Este espectáculo contará coa presenza de Policía Local, Bombeiros, Garda Civil, Protección Civil e ambulancia. Ás 00:30 comezará o concerto da Orquesta Cinema no Campo da Feira, e pecharase a rúa Molinera por seguridade. Na madrugada, os DJ’s actuarán no palco da rúa Luis González Taboada.
O luns 22, a Banda de Vilatuxe actuará ás 13:00 e ás 20:30 na Praza da Vila, polo que se pechará a rúa Luis González Taboada en ambos momentos. A Praza de Loriga pecharase entre as 18:00 e as 21:00 para exhibicións deportivas e de baile. Ás 00:00 terá lugar o concerto da Orquestra París de Noia no entorno da Estación de Autobuses, e a rúa da Estación pecharase desde a tarde para a montaxe do palco.
O martes 23, último día de festexos, volverase cortar a rúa Luis González Taboada para os concertos da Banda de Muimenta ás 13:00 e ás 20:30. Ás 22:00, o concerto da Charanga Ardores na rúa Melide obrigará ao peche desta vía desde Praza da Marina ata Monte do Faro. O palco situarase á altura da rúa Alcalde Ferreiro, e o tráfico desviarase pola rúa Pintor Colmeiro. A actuación da Orquesta Panorama no Campo da Feira non precisará peches específicos, pero pecharase a rúa Molinera por seguridade.
Durante todos os días das festas, o Concello contará con servizos reforzados da Policía Local e dos equipos de Emerxencias, co apoio dos voluntarios de Protección Civil, Garda Civil e Bombeiros de Deza, especialmente durante o espectáculo pirotécnico do domingo. Tamén haberá ambulancia contratada para os principais concertos e espectáculos.
Como medida adicional, entre as 20:00 do sábado e as 04:00 do domingo instalarase unha Caravana Morada na rúa Rosalía de Castro, como punto de atención e prevención.
O Concello de Lalín agradece a colaboración da cidadanía e solicita que se respecten as indicacións de tráfico e seguridade para garantir unhas festas participativas e seguras.
