- A concelleira de Cultura agradécelle publicamente en nome do pobo de Lalín a doazón desta obra, pola deferencia que Nolo Suárez tivo con este concello e pola súa contribución ao enriquecemento dos fondos do Museo Municipal
O Concello de Lalín vén de aceptar a doazón dun cadro do pintor compostelán Manuel Suárez Varela, Nolo Suárez de nome artístico, titulado “O astrónomo, homenaxe a D. Ramón Mª Aller” que formou parte de “A través do Ar”, proxecto expositivo individual de Nolo Suárez, obra de 2025, exposición realizada no Museo Municipal no pasado mes de agosto. Así o explica a concelleira de Cultura, Begoña Blanco, que informa que a dita aceptación da doazón desta peza vén de ser aprobada en xunta de goberno local.
Nolo Suárez fai constar que quere facer a doazón de dito cadro para o Museo Ramón Mª Aller para formar parte da súa colección artística. Trátase dun acrílico sobre lenzo con medidas de 65 x 70 cm do que se incorpora firma persoal do autor e selo do mesmo para a autenticidade do documento.
Begoña Blanco indica que desde o Concello agradéceselle publicamente en nome do pobo de Lalín á Nolo Suárez a doazón desta obra, pola deferencia que tivo con este municipio e pola súa contribución ao enriquecemento dos fondos do Museo Municipal. Cómpre recordar que nas últimas semanas tamén pasou a formar parte da colección permanente do Ramón Mª Aller Ulloa a obra “Madeira” de Elena Colmeiro, doada polo seu fillo.
