Concello de LALÍN

O alcalde de Lalín, José Crespo, e o concelleiro de Política Social e Infancia, Avelino Souto, visitaron estes días as instalacións de Aspadeza, onde mantiveron un encontro coa directiva e cos usuarios desta asociación referente na integración social e asinaron un novo convenio de colaboración para este 2025.

O acordo, asinado entre o alcalde e a presidenta de Aspadeza, María Taboada, establece unha achega municipal de 5.000 euros, destinada a apoiar o programa de atención a persoas con discapacidade psíquica que desenvolve a asociación, co obxectivo de favorecer a súa integración e de mellorar a calidade de vida das familias, ao tempo que visibilizar o seu labor na sociedade.

Grazas a este convenio, Aspadeza poderá financiar parte do mantemento das instalacións do centro, así como actividades externas de integración como a colaboración na limpeza de 81 xardineiras municipais situadas en distintas rúas lalinenses, a sinalización de rutas de sendeirismo ou a colocación de carteis de actividades do Concello.

Na actualidade, Aspadeza atende diariamente a 39 usuarios de 58 familias, maiormente de Lalín pero tamén de todos os concellos da Comarca. O alcalde destacou que Aspadeza é un proxecto social imprescindible para Lalín e Deza, que leva vinte e cinco anos acompañando a persoas e familias, e o Concello seguirá ao seu lado con apoio económico e institucional. Así mesmo sinalou que este convenio non é só unha axuda económica senón que tamén é un recoñecemento ao esforzo e á entrega de todas as familias e profesionais que fan posible este labor.

Pola súa parte, o concelleiro de Política Social, Avelino Souto, subliñou que este convenio é un exemplo de colaboración real entre administracións e entidades sociais, imprescindible para avanzar na igualdade de oportunidades e na integración das persoas con discapacidade. Con este acordo reforzamos unha liña estratéxica da nosa acción de goberno: estar ao carón das entidades sociais que son imprescindible no territorio.