- O vindeiro mes lerán “Plata Quemada” de Ricardo Piglia, ligada ao escenario urbano de Bos Aires
- Así mesmo, na xuntanza ultimáronse os detalles da excursión que realizará o grupo este sábado, no que farán de mañá unha visita guiada a Pazo Baión e finalmente, a petición das participantes, realizarán pola tarde un percorrido comentado pola Bienal do Museo de Pontevedra
Esta tarde, ás 20 h, no edificio sociocultural da rúa Manuel Rivero, como cada último xoves do mes, terá lugar unha nova reunión mensual do club de lectura para persoas adultas, que reúne unha vintena de persoas adultas lalinenses arredor da literatura como espazo de reflexión compartida.
Nesta ocasión, o libro a comentar foi “Granito”, de Álex Alonso (gañador ex aequo do Premio Torrente Ballester de Narrativa en galego da Deputación da Coruña). A novela chamou a atención polo seu estilo directo e pola maneira en que transmite a dureza e tamén a dignidade da vida no rural. Nas intervencións destacou a forza dunha linguaxe próxima á oralidade, que fai que a historia resulte moi viva, e tamén a capacidade do autor para reflectir como a memoria e as experiencias familiares deixan marca nas persoas.
A conversa xirou arredor de temas como o peso das orixes, a dureza cotiá e a forma en que as historias individuais acaban contando tamén unha realidade colectiva. Como é habitual, na xuntanza amosáronse diferentes opinións sobre a novela, xerándose un interesante debate, xa que as participantes (na súa maioría mulleres), posúen un gran bagaxe lector, e contan con moitas referencias e gran criterio crítico de cara á literatura.
O próximo libro a comentar será “Plata Quemada”, de Ricardo Piglia, unha novela inspirada en feitos reais: o asalto a un banco en Bos Aires en 1965 e a posterior persecución policial. Máis alá da acción, a obra é tamén unha reflexión sobre a violencia, a corrupción e os límites entre verdade e ficción. Considerado un dos grandes narradores arxentinos contemporáneos, Piglia soubo mesturar a intriga co pensamento crítico, e en Plata Quemada acadou unha das súas obras máis celebradas.
Na sesión avanzouse un punto de unión entre ambas lecturas: se “Granito” fala da violencia silenciosa, apegada á terra e ás relacións persoais, “Plata Quemada” leva esta temática ao escenario urbano.
Así mesmo, na xuntanza ultimáronse os detalles da excursión que realizará o grupo este sábado, no que farán de mañá unha visita guiada a Pazo Baión e finalmente, a petición das participantes, realizarán pola tarde un percorrido comentado pola Bienal do Museo de Pontevedra.
