- Dobre planta no teito do Lalín Arena e catro colexios completados; a vindeira semana arrincan UNED, centro ocupacional, pavillón, escolas infantís e Auditorio
- Arredor de 1.000 paneis de 590 W, telexestionados e orientados ao autoconsumo municipal con posibilidade de compartir excedentes nun radio de ata 5 km
A empresa de servizos enerxéticos do Concello de Lalín, conformada por Framiñán e Monrabal, completou a primeira fase do despregue fotovoltaico municipal, con seis plantas xa en funcionamento e producindo, e activa a seguinte para acadar un total de doce instalacións e 560 kW de potencia agregada.
No teito do Lalín Arena, que dá servizo ao multiusos e á piscina municipal, están xa operativas dúas plantas independentes de 90 kW cada unha, sumando 180 kW no mesmo tellado. Tamén están completadas as instalacións dos colexios de Prado, Cercio, Manuel Rivero e Xesús Golmar, o que eleva a seis o número de plantas hoxe en produción. A vindeira semana iniciaranse os traballos no edificio de UNED, no centro ocupacional, no pavillón municipal, nas dúas escolas infantís e no Auditorio; estas novas plantas quedarán rematadas e producirán electricidade ao longo do mes de outubro, segundo o calendario previsto.
O conxunto do plan prevé a instalación de arredor de mil paneis solares de última xeración, de 590 W por módulo, dos que dous terzos xa están colocados e conectados. Todas as plantas estarán telexestionadas e administradas en función das necesidades de consumo de cada edificio municipal, o que permite optimizar a produción e a demanda en tempo real. A potencia total proxectada é de 560 kW, unha capacidade equivalente ao subministro eléctrico aproximado de preto de 200 vivendas en condicións estándar.
12 PLANTAS, MIL PANEIS, E 560kW
Por instalacións, a capacidade queda configurada do seguinte xeito: no Lalín Arena hai dúas plantas de 90 kW (180 kW no seu conxunto); o pavillón municipal, o CEIP Xesús Golmar e o Auditorio municipal dispoñen de 50 kW cada un; o CEIP Prado conta con 41 kW; o centro ocupacional achega 40 kW; a UNED dispón de 20 kW; e as dúas escolas infantís suman 12 kW por cada centro. Estas doce plantas producirán enerxía para o consumo directo nos propios edificios municipais. Nas instalacións de alta demanda continua, como a piscina ou o Lalín Arena, a práctica totalidade da xeración será absorbida polas propias dependencias. Noutros casos, como os centros educativos, a UNED ou o centro ocupacional, a xeración cubrirá o autoconsumo e tamén permitirá subministrar potencia a outras dependencias municipais, como a Casa do Concello, sempre dentro de radios non superiores a 5 km, en liña coa normativa vixente.
50% DE REDUCIÓN DE CONSUMOS E TONELADAS AFORRADAS NA PEGADA DE CARBONO
O modelo colectivo e interconectado de produción permitirá acadar un aforro enerxético arredor do 50% e reducir á metade a pegada de carbono das instalacións municipais un avance sen precedentes que consolida o compromiso do Concello de Lalín co coidado do medio ambiente e cunha aposta decidida polas enerxías renovables. En paralelo ao despregue fotovoltaico, a outra gran liña de actuación, centrada na eficiencia a través de tecnoloxías de baixo consumo como a iluminación LED, avanza a bo ritmo: o 90% das luminarias dos edificios municipais xa foron migradas a LED, quedando pendentes os dous colexios máis grandes de Lalín e a culminación das intervencións na UNED e no centro ocupacional.
Conxuntamente, estas medidas reforzan a autonomía enerxética municipal, estabilizan os custos a medio e longo prazo e melloran o desempeño ambiental do conxunto das instalacións públicas.
