- A concelleira de Cultura avanza as actividades que se desenvolverán no vindeiro mes
A 17ª Bienal das Artes Pintor Laxeiro será unha das primeiras actividades do mes de outubro. Comisariada polo presidente da Real Academia Galega de Belas Artes (RAGBA), Manuel Quintana Martelo, leva por título “Paisaxes e Sombras” e está dedicada a unha ducia de artistas de recoñecida traxectoria e proxección como o propio Quintana Martelo, Mónica Alonso, Bosco Caride, Alfonso Galván, Francisco Leiro, Concha Martínez Barreto, Jorge Martins, Teresa Moro, Susanne Thelmitz, Carmen Van der Eynden e dous referentes universais da nosa terra como son Colmeiro e Laxeiro. Todos eles están unidos por un fío condutor: a exploración da percepción da sombra desde a paisaxe. A Bienal inaugurase o vindeiro venres, 3 de outubro, ás 20 h, no Museo Municipal Ramón Mª Aller nun acto aberto á participación da veciñanza e visitantes.
Cómpre indicar que os sábados 4, 11, 18 e 25 de outubro ás 12.30 h. terán lugar visitas guiadas á Bienal, para as que non é necesaria inscrición previa. Si será preciso reservar visitas para os grupos, que se poden fixar de martes a venres noutro horario, así como formalizar a reserva nos obradoiros complementarios que se ofrecerán.
Ao longo do mes de outubro tamén se desenvolverán tres actividades de dinamización lectora, todas ás 18.30 h, na Biblioteca Municipal:
- o xoves 2 de outubro, “Aldara na montaña” de Soraya Lema, unha historia de superación e de busca da identidade propia, ao tempo que pon en valor o noso patrimonio natural e cultural. Dirixida a nenos/as de 6 a 12 anos. Duración: 40 minutos.
- o xoves 16 de outubro, “Os contos do gato” de Bandullo Azul, para nenos/as de 3 a 12 anos con contos, cancións e ganas de pasalo ben. Narra a historia de Fazulas, un gato dormilón, comilón e un pouco burlón co seu amigo o Profesor ao que lle encanta compartir historias que el mesmo vive coma se fose o protagonista. Duración: 50 minutos.
- e o xoves 30 de outubro, “Kiddie + Pirata Gemola” de Gemola para bebés 0 a 3 anos que trata sobre un barco pirata cunha caixa do tesouro moi especial. A actividade abrangue teatro de sombras, cancións e música e algunha que outra sorpresa. Duración: 20 minutos.
O teatro terá tamén presenza con dúas funcións: “Herencia compartida” o sábado 4 de outubro ás 18 h. no Salón Teatro e “Pasa para a cama” o domingo 19 de outubro ás 19 h. no Salón Teatro.
A agrupación lalinense Lusco e Fusco pon en escena “Herencia compartida”, unha obra que pretende reivindicar o rural a través dunha historia protagonizada por unha parella nova que recibe unha casa na aldea como herdanza e na semella que empeza a haber espíritos. A entrada é libre ata completar aforo.
Dous Rombos...“Pasa para a cama” é unha función a cargo de Sergio Alba que mira con humor á epoca onde se mandaba á cama cando saían os dous rombos na pantalla da televisión. As entradas poderán mercarse de forma anticipada a 8 euros e a 10 euros en taquilla. Poderán adquirirse anticipadamente na froitería A Maragota e en Don Bombón.
A XVII recreación do proceso do liño protagonizará a xornada do sábado 11 de outubro a partir das 16 h. en Doade a cargo do Museo Casa do Patrón e da Asociación M. R. San Bartolomeu de Ínsua (Vilalba), na que tamén haberá unha exposición de roupas de liño e la e se desenvolverá a Foliada da Fía coas actuacións de Pandereiteiras A Xariza de Parada e as Pandereteiras da Casa do Patrón.
En outubro tamén terá lugar o sábado 25 ás 18 h. o VII Festival de Corais de Outono promovido pola Coral de Lalín, no Salón Teatro.
O domingo 26 iniciarase o programa “Un Lalín de cine”, do que se darán máis detalles proximamente, co filme de debuxos animados “Chicken run: o amencer dos nuggets”. Ás 18 h. no Salón Teatro con entrada libre.
As persoas maiores tamén terán poderán desfrutar de “A idade de Ouro en movemento”, con sesións de baile os domingos 5, 12, 19 e 26 de outubro, que se desenvolverán ás 18.30 h. no Centro Comercial Pontiñas.
