- Comentarán a visita realizada á Bienal de Pontevedra e tamén aproveitarán para participar nun percorrido guiado pola 17ª Bienal Pintor Laxeiro “Paisaxes e Sombras” e tamén lerán textos en voz alta da autoría das propias artistas que participan na exposición, afondando na relación entre a escrita e as artes plásticas
O club de lectura de Lalín, promovido pola Concellería de Cultura, celebrará o Día das Escritoras, o vindeiro luns, 13 de outubro, cunha xuntanza extraordinaria para conmemorar esta data tan significativa.
Reuniranse ás 19.00 no Museo Municipal Ramón Mª Aller para comentar a visita que realizaron o pasado día 27 de setembro á Bienal de Pontevedra, no marco da excursión realizada a través do programa +Convivencia da Deputación, na que visitaron tamén o Pazo Baión. Varias participantes do club de lectura pediron ter un día para comentar a dita Bienal. Así mesmo tamén participarán nun percorrido guiado da 17 Bienal Pintor Laxeiro “Paisaxes e Sombras”.
Tamén lerán textos en voz alta da autoría das propias artistas que participan na exposición, afondando na relación entre a escrita e as artes plásticas, sendo unha práctica habitual a redacción de contidos que acompañan os catálogos ou a creación xa nomeadamente literaria das artistas.
Lerase o breve texto “O efecto reliquia”, de Teresa Moro. Xa no terreo da poesía, e escollendo un traballo en relación coas artes plásticas, lerase un poema de Olga Novo, no que os conceptos da natureza e as sombras protagonistas da Bienal están presentes.
