- O alumnado combinou a formación teórica con traballo efectivo
O Concello de Lalín clausurou onte o programa de emprego de garantía xuvenil Amorea, no Concello de Lalín, con presenza do alcalde, José Crespo, e do delegado territorial da Xunta en Pontevedra, Agustín Reguera.
O programa, que tivo unha duración de preto dun ano, contou cun financiamento de preto de 280.000 euros que permitiu que 10 mozos e mozas se formasen de forma teórica e práctica na especialidade de Xestión de almacén e aprovisionamento.
Cómpre destacar a importancia deste tipo de iniciativas nas que a Xunta colabora cos concellos para apostar de forma directa e decidida pola mellora da empregabilidade dos mozos e mozas galegos. Cabe destacar que, ademais de recibir unha formación teórica, os participantes realizaron un traballo efectivo nas instalacións municipais.
Cómpre subliñar que Lalín organizou tamén un obradoiro de emprego dual “Sámago”, que rematou hai unhas semanas e que involucrou a 20 persoas desempregadas nas modalidades de Albanelería e Forestais. Esta modalidade de obradoiro tamén combina a formación teórica con traballos que se desenvolven nos propios concellos. Así, esta iniciativa contou cun investimento por parte da Xunta de preto de 420.000 euros.
