- Léronse textos en voz alta de Olga Novo e de Teresa Moro
- Con esta proposta, Lalín sumouse á celebración desta cita recoñecendo o papel das mulleres na literatura e nas artes, e reforzando a vocación da Bienal como espazo aberto ao debate e de encontro entre disciplinas.
O Concello de Lalín celebrou o Día Internacional das Escritoras cunha lectura en diálogo coa arte contemporánea na Bienal Paisaxes e Sombras.
Begoña Blanco indica que “no marco da Bienal de Lalín e coincidindo coa celebración do Día Internacional das Escritoras, o Concello organizou unha lectura en alto que uniu poesía e artes plásticas arredor da exposición Paisaxes e sombras”. “O obxectivo principal da actividade foi recoñecer a contribución das mulleres á literatura e á creación artística, favorecendo o diálogo entre palabra e imaxe”, remarca.
A conmemoración deste día —impulsado en 2016 pola Biblioteca Nacional de España, a Federación Española de Mulleres Directivas (FEDEPE) e a Asociación Clásicas y Modernas— busca visibilizar o legado cultural das escritoras ao longo da historia e promover a igualdade no ámbito da cultura.
O acto centrouse no poema “Mentres a herba medre” da poeta galega Olga Novo (A Pobra do Brollón, 1975), Premio Nacional de Poesía 2020 polo seu libro Feliz idade. A súa obra, caracterizada pola fusión entre natureza, corpo e memoria, establece unha conexión profunda coa terra e co paso do tempo, aspectos que tamén articulan a proposta pictórica de Concha Martínez Barreto, presente na Bienal.
A lectura permitiu trazar pontes entre a linguaxe poética e a pintura contemporánea, poñendo de relevo coincidencias entre ambas creadoras: o interese pola paisaxe como espazo simbólico, a exploración da memoria e a identidade persoal, e a presenza da sombra como metáfora do paso do tempo e da experiencia vivida.
A sesión ampliouse coa lectura do texto “O efecto reliquia” de Teresa Moro, no que a autora reflexiona sobre o valor da arte como memoria material e como acto de resistencia fronte á estandarización. O texto, a medio camiño entre o ensaio e a prosa poética, amosou a súa teoría sobre a permanencia do feito creativo.
Posteriormente, e xa en relación coa Bienal, a concelleira de Cultura Begoña Blanco resaltou “a importancia desta exposición, tanto a nivel local como a nivel autonómico, tratándose dun gran proxecto de longo percorrido e continuidade ininterrompida, que se puxo en marcha grazas ao impulso do Concello e á figura de Laxeiro, no ano 1993”. “Moitas das asistentes expuxeron a súa visión e recordos xa das primeiras edicións das bienais, e reflexionouse sobre o cambio de formato e a adaptación do mesmo ao paso do tempo e ás correntes actuais”, precisou.
Despois realizaron unha visita guiada á Bienal Paisaxes e Sombras, e pecharon o acto comentando esta mostra e tamén cuestións da outra bienal recentemente visitada.
Con esta proposta, Lalín sumouse á celebración da cita recoñecendo o papel das mulleres na literatura e nas artes, e reforzando a vocación da Bienal como espazo aberto ao debate e de encontro entre disciplinas.
