- “As Áreas Parroquiais axudarán a pensar e actuar en clave de conxunto, compartindo recursos e reforzando a vida comunitaria para ofrecer servizos máis eficientes e próximos”, afirma Pérez Asorey.
A Tenente de Alcalde e concelleira responsable da Axenda Urbana, María Paz Pérez Asorey, anuncia unha serie de charlas cos pedáneos para seguir avanzando na activación de Áreas Parroquiais incluídas no Plan de Acción da Axenda Urbana de Lalín, configuración do territorio municipal que ten por obxectivo dinamizar o rural e mellorar a prestación de servizos mediante núcleos que agrupen varias parroquias e funcionen como polos vertebradores. “As Áreas Parroquiais axudarán a pensar e actuar en clave de conxunto, compartindo recursos e reforzando a vida comunitaria para ofrecer servizos máis eficientes e próximos”, afirma Pérez Asorey.
O proxecto inclúe unha campaña de comunicación para dar a coñecer á veciñanza, primeiro a través dos pedáneos e despois directamente cos veciños das parroquias, esta nova organización territorial. A través de presentacións e obradoiros nos locais sociais, fomentarase a idea de pertenza a cada área e a comprensión dos beneficios que achega a súa creación. “Queremos explicar con claridade que gaña cada parroquia ao integrar a súa Área: coordinación, oportunidades e máis capacidade para responder ás necesidades reais”, engade a tenente de alcalde.
Como punto de partida celebraranse reunións cos pedáneos das parroquias que conforman cada área parroquial. Nestas xuntanzas presentarase o plan de dinamización e entregarase unha enquisa para detectar necesidades, prioridades e suxestións de mellora en cada territorio. “Os pedáneos son peza clave como canle directa co territorio. Coas enquisas recolleremos información valiosa para que o proceso posterior, xa aberto á veciñanza, sexa útil e concreto”, subliña a responsable da Axenda Urbana.
CALENDARIO DE XUNTANZAS
O calendario desta primeira rolda comeza o martes 21 de outubro de 2025, ás 12.00 horas en Val do Boi e ás 19.00 horas en Carrio Sur; continúa o martes 28 de outubro de 2025, ás 18.00 horas en Entre Ríos, ás 19.00 horas en Alto de Vales e ás 20.00 horas en Vía da Prata; e pecha o xoves 30 de outubro de 2025, ás 12.00 horas en A Balouta, ás 18.00 horas en Val do Deza e ás 19.00 horas en Val do Arnego. Coas achegas recollidas nestas reunións convocaranse, a continuación, as xuntanzas nos locais sociais abertas a toda a veciñanza.
“Este é un proceso participativo e transparente desde o primeiro día. Convido á cidadanía a implicarse: canto máis precisas sexan as propostas, máis acertadas serán as decisións para cada Área Parroquial”, conclúe María Paz Pérez Asorey.
CALENDARIO DE REUNIÓNS COS PEDÁNEOS
Martes, 21 de outubro de 2025
- 12:00 · Val do Boi
- 19:00 · Carrio Sur
Martes, 28 de outubro de 2025
- 18:00 · Entre Ríos
- 19:00 · Alto de Vales
- 20:00 · Vía da Prata
Xoves, 30 de outubro de 2025
- 12:00 · A Balouta
- 18:00 · Val do Deza
- 19:00 · Val do Arnego
