- “As Áreas Parroquiais axudarán a pensar e actuar en clave de conxunto, compartindo recursos e reforzando a vida comunitaria para ofrecer servizos máis eficientes e próximos”, afirma Pérez Asorey
- O proxecto inclúe unha campaña de comunicación para dar a coñecer a veciñanza, primeiro a través dos pedáneos e despois directamente cos veciños das parroquias, esta nova organización territorial
- Nesta xornada tiveron lugar as dúas primeiras reunións informativas coas áreas de Val do Boi e Carrio Sur
Onte deu comezo a campaña informativa do Concello de Lalín con pedáneos e veciños a fin de seguir avanzando na activación das Áreas Parroquiais incluídas no Plan de Acción da Axenda Urbana de Lalín, configuración do territorio municipal que ten por obxectivo dinamizar o rural e mellorar a prestación de servizos mediante núcleos que agrupen varias parroquias e funcionen como polos vertebradores do territorio, tal como sinala a tenente alcalde e concelleira responsable da Axenda Urbana, María Paz Pérez Asorey.
No día de hoxe arrancou a primeira rolda desta campaña informativa con reunións ás 12.00 horas coas áreas de Val do Boi e ás 19.00 horas en Carrio Sur. Encontros de traballo que continuarán o vindeiro martes 28 de outubro, ás 18.00 horas coa reunión da área en Entre Ríos, ás 19.00 horas coa de Alto de Vales e ás 20.00 horas coa Vía da Prata. O xoves 30 de outubro será a última xornada destas reunións: ás 12.00 horas, reunión coa área da Balouta, ás 18.00 horas coa de Val do Deza e ás 19.00 horas coa de Val do Arnego. Coas achegas recollidas nestas reunións que teñen lugar na casa consistorial convocaranse, a continuación, as xuntanzas nos locais sociais abertas a toda a veciñanza.
A tenente alcalde remarca que “este é un proceso participativo e transparente desde o primeiro día. Convido á cidadanía a implicarse: canto máis precisas sexan as propostas, máis acertadas serán as decisións para cada Área Parroquial”.
Fomentar a idea de pertenza a cada área e os beneficios que achega a súa creación
O proxecto inclúe unha campaña de comunicación para dar a coñecer á veciñanza, primeiro a través dos pedáneos e despois directamente cos veciños das parroquias, esta nova organización territorial. A través de presentacións e obradoiros nos locais sociais, fomentarase a idea de pertenza a cada área e a comprensión dos beneficios que achega a súa creación. “Queremos explicar con claridade que gaña cada parroquia ao integrar a súa Área: coordinación, oportunidades e máis capacidade para responder ás necesidades reais”, engade a tenente de alcalde.
Como punto de partida celebraranse reunións cos pedáneos das parroquias que conforman cada área parroquial. Nestas xuntanzas presentarase o plan de dinamización e entregarase unha enquisa para detectar necesidades, prioridades e suxestións de mellora en cada territorio. “Os pedáneos son peza clave como canle directa co territorio. Coas enquisas recolleremos información valiosa para que o proceso posterior, xa aberto á veciñanza, sexa útil e concreto”, subliña a responsable da Axenda Urbana.
CALENDARIO DE REUNIÓNS COS PEDÁNEOS
Martes, 21 de outubro de 2025
- 12.00 · Val do Boi
- 19.00 · Carrio Sur
Martes, 28 de outubro de 2025
- 18.00 · Entre Ríos
- 19.00 · Alto de Vales
- 20.00 · Vía da Prata
Xoves, 30 de outubro de 2025
- 12.00 · A Balouta
- 18.00 · Val do Deza
- 19.00 · Val do Arnego
