- A nova entrada, situada na planta intermedia, contará cunha reixa eléctrica e mellorará a comodidade dos usuarios habituais.
- Os traballos rematarán nas vindeiras semanas.
O Concello de Lalín informa de que avanzan a bo ritmo as obras de apertura da nova porta de acceso no párking Europa, situada na planta intermedia do edificio. O concelleiro de Urbanismo, Pablo Areán, e a concelleira responsable do equipamento, Karen Fernández, visitaron hoxe a infraestrutura para supervisar o avance dos traballos.
A actuación contempla a instalación dunha reixa eléctrica de acceso, xa colocada, e a creación dun novo punto de entrada peonil exclusiva para abonados, que permitirá un acceso máis directo, rápido e cómodo ao aparcadoiro. A intervención completarase coa apertura da citada porta frontal para os abonados, o acondicionamento do acceso rodado e o adecentamento do entorno exterior, tarefas que se desenvolverán nas próximas semanas.
Segundo explicou o concelleiro de Urbanismo, Pablo Areán, “esta mellora permitirá optimizar o uso das instalacións e ofrecer un servizo máis áxil aos usuarios abonados que empregan o párking de forma habitual”.
A actuación tamén supón unha “mellora funcional na organización interna do tráfico, xa que a nova entrada permitirá separar os fluxos de circulación entre abonados e usuarios ocasionais, evitando cruces innecesarios e mellorando a comodidade para todos”.
Unha vez finalizadas as obras, previstas para as vindeiras semanas, o novo acceso quedará completamente operativo, facilitando a entrada e saída dos vehículos dos abonados sen necesidade de desprazarse polas ramplas do aparcadoiro.
