Concello de LALÍN

A concelleira de Cultura, Begoña Blanco, anunciou hoxe a finalización dos traballos de mellora e renovación estética no Auditorio Municipal. O obxectivo desta intervención é ofrecer á veciñanza un espazo cultural máis moderno, funcional e acolledor, nunhas instalacións que acollen unha intensa actividade cultural ao longo de todo o ano.

Blanco explica que as obras se centraron principalmente na remodelación estética da Sala Tuno Valdés, e no pintado de paredes, portas e corredores no Auditorio en tonalidades neutras. Así, sinala a responsable municipal, que “na Sala Tuno Valdés se tapizaron de novo todas as butacas nunha cor máis clara que a que tiñan para aportar maior luminosidade ao espazo e crear un ambiente sereno que favoreza a atención do público”. Ademais, remarca, que se empregou “unha tea lavable e de fácil limpeza”.

Engade tamén que “a parede que anteriormente estaba pintada de cor marela pasou agora a unha tonalidade crema acorde co novo tapizado de butacas”. No que respecta ao resto de zonas comúns, explica que “os corredores se pintaron en gris e branco, substituíndo as cores laranxa e verde anteriores, e as portas pasaron a negro no canto do antigo laranxa”. “En definitiva, apostouse por cores neutras en paredes, portas e corredores, en substitución das tonalidades máis intensas que había ata o de agora”, precisa.

Novas fases previstas

Avanza que “proximamente preténdese continuar co pintado da zona de aulas” e “que esta é só a primeira fase do plan de mellora do Auditorio”. “Así de cara o ano próximo, prevese seguir acometendo melloras e reformas na sala principal do Auditorio, que é onde se celebran os actos grandes e onde actúa a Banda”, anuncia. “Estas actuacións incluirán “novas propostas estéticas que seguirán a liña de modernización iniciada na Sala Tuno Valdés, buscando sempre ofrecer o mellor á veciñanza”, conclúe.