- En total serán 111 menores de 68 unidades familiares as beneficiarias
- Por primeira vez contouse cunha partida municipal de 3.000 euros e cunha ampla colaboración social
- O concelleiro de Política Social e Infancia agradece a todas as entidades sociais que fixeron posible a campaña, así como o voluntariado do Desván que dedican moitas horas á preparación dos xogos e xoguetes para a súa entrega
Estes días procederase a facer o reparto dos agasallos da campaña “Ningún neno/a sen xoguete”. Esta é a primeira vez que esta iniciativa solidaria conta cunha partida municipal económica específica de 3.000 euros que foron destinados á compra de xogos educativos e regalos, aos que se sumaron, como viña sendo habitual, as doazóns de particulares, colectivos e establecementos. Un feito que avanzaba xa o edil de Política Social e Infancia, Avelino Souto, na presentación da campaña.
Coa achega municipal realizouse compra de xogos e xoguetes novos a estrear en tres entidades: Xoguetería Imaxina Toys onde se mercaron fundamentalmente xogos didácticos e de mesa para todas as idades; Librería Dalvi onde se compraron maioritariamente xogos educativos e de aprendizaxe e Librería Raíces onde se adquiriu material escolar variado.
Souto remarca que “coa achega municipal e coas doazóns de todas as entidades e colectivos locais logrouse que todos e cada un dos/as menores poidan contar cun agasallo novo a estrear, un usado en perfecto estado e un libro”. En total serán 111 menores de 68 unidades familiares os/as destinatarias desta campaña solidaria.
O concelleiro de Infancia e Política Social “agradece a doazón de todas as entidades locais que fixeron posible a campaña, así como o labor do voluntariado do Desván que cada ano colabora seleccionando, clasificando e arranxando xoguetes”.
Souto remarca “a resposta positiva das entidades e asociacións que quixeron sumarse á campaña e que grazas á súa solidariedade comunitaria lograr manter viva un ano máis esta iniciativa, xunto con entregas de persoas anónimas que se acercaron ata o Desván a deixar os seus agasallos”.
As entidades colaboradoras que tomaron parte na campaña, ademais dos tres establecementos xa mencionados onde o Concello mercou xogos e xoguetes novos, foron:
1. Residencia DomusVi de Lalín: sumouse á campaña colocando no seu centro un punto de recollida de agasallos. Colaboraron coa campaña aportando un lote de xogos e xoguetes usados en bo estado de uso.
2. Grupo de Amigos de Lalín: colaboraron cunha doazón pecuniaria que depositaron na xoguetería “Juguettos”, onde se mercaron fundamentalmente xogos de manualidades e construción a estrear.
3. Tienda Mi Casa Lalín: sumouse á campaña colocando no seu centro un punto de recollida de agasallos, onde se recolleron unha vintena de xogos e xoguetes en perfecto estado de uso.
4. Asociación de Veciños de Camposancos: colaboraron facendo unha recollida solidaria e aportaron un lote de xogos e xoguetes en bo estado de uso.
5. Asociación “Carabelo”: colaboraron coa campaña aportando o remanente de xogos e xoguetes que lle quedou do seu Mercadiño Solidario.
6. Asociación “Aranes”: colaboraron con xogos e lotes de libros que quedaron do seu mercadiño tamén.
7. Asociación “Recycling”: colaborou aportando xogos, xoguetes e triciclos que recibiron en diferentes doazóns.
8. Centro comercial y de ocio Pontiñas-Gadis: colocaron un punto de recollida de xoguetes que vai quedar colocado ata o día de Reis co propósito de seguir recadando doazóns, que se ben non serán entregadas nesta campaña, serán remanente para a próxima.
9. Doazóns anónimas de persoas que achegaron os seus agasallos ata as instalacións do Desván municipal: máis dunha ducia entregaron xogos, xoguetes, libros e peluches en bo estado de uso.
