- A veciñanza lalinense poderá desfrutar o domingo 18 de xaneiro do espectáculo teatral “Memorias dun neno labrego” no Salón Teatro de Santiago ás 18 h para o que sairá un bus gratuíto ás 15.50 h da Praza do Concello. As persoas que desexen asistir deben facerse no teléfono 986787060 reservando praza mediante pago previo de 5 euros ata o 15 de xaneiro
O domingo, 18 de xaneiro, os lalinenses poderán desfrutar dun espectáculo teatral a través dunha nova edición de Sobes ao bus do teatro?, programa de mobilidade do Centro Dramático Galego (CDG) que trata de achegar as producións do CDG ao público de toda Galicia. Neste caso o espectáculo que poderá verse será “Memorias dun neno labrego”, función recomendada para todos os públicos que terá lugar no Salón Teatro de Santiago de Compostela.
Todas as persoas que desexen asistir terán ao seu dispor un servizo gratuíto de autobús ata completar as prazas ofertadas para asistir á función, con entradas a 5 euros. O autobús sairá ás 15.50 horas da Praza do Concello (Lalín) e prégase máxima puntualidade. A función terá lugar ás 18 h no Salón Teatro de Santiago e a hora de saída, tras a función para regresar a Lalín, será ás 20.15 horas. As inscricións deben facerse no teléfono 986787060 reservando praza mediante pago previo de 5 euros ata o 15 de xaneiro.
“Memorias dun neno labrego”, proposta teatral baseada no libro de Xosé Neira Vilas, está dirixida por Cándido Pazó que tamén é autor do texto, e contan con Xúlio Abonjo, Manuel Cortés, Iris Darriba, Mónica García, Federico Pérez Rey, Santi Romay e Ana Santos entre o elenco de actores. É un espectáculo que trata sobre as lembranzas de Balbino, o rapaz de aldea, que se presenta como a memoria colectiva dunha Galicia rural que se foi diluíndo ou transformando, poñendo en primeiro termo a emoción, pero botando tamén man do humor e dunha relación directa e amena co público.
