A xornada formativa especializada en escaparatismo de Nadal que se impartiu o domingo tivo unha moi boa afluencia
Karen Fernández avanza que o dito concurso desenvolverase entre o 13 de decembro e o 5 de xaneiro e que a veciñanza poderá votar polos escaparates que máis lle gustan a través dun código QR. Levarán unha casiña de Aldeas de Nadal como elemento diferencial e ademais deberán contar unha historia ou un conto a través do seu escaparate
A responsable das Aldeas de Nadal indica que o 29 de novembro, data de inauguración dos escaparates máxicos, un personaxe caracterizado irá contando a historia de cada un dos catro escaparates máxicos que se crearán en catro das rúas céntricas lalinenses
Os escaparates máxicos, unha das novidades deste ano das Aldeas de Nadal, que constitúe un proxecto piloto de dinamización do pequeno comercio e que se desenvolve grazas ao apoio da Dirección Xeral de Comercio da Xunta de Galicia, inauguraranse o venres, 29 de novembro, ás 19.30 h, data na que tamén se fará o acendido das luces de Nadal.
Así o explica a concelleira da área de Aldeas de Nadal, Karen Fernández, que subliña que “o día da inauguración un personaxe caracterizado irá contando a historia de cada un dos catro escaparates máxicos que se crearán con escenografía de Nadal en catro escaparates baleiros e estratexicamente elixidos, que estarán concentrados en catro rúas céntricas (Wenceslao Calvo Garra, Colón, Joaquín Loriga e Avenida Luis González Taboada), e cos que se creará un percorrido polo comercio local a través das Adeas de Nadal, fomentando así o fluxo de persoas no comercio local”.
Karen Fernández remarca “que ademais destes catro escaparates máxicos desenvolverase, para todos aqueles comerciantes que queiran participar, un concurso de escaparates máxicos de Aldeas de Nadal que imos poñer en marcha co obxectivo de fomentar que os comerciantes decoren os seus escaparates con creatividade e sustentabilidade, a cambio de que teñan unha serie de incentivos”.
Formación gratuíta especializada en escaparatismo de Nadal
Neste sentido lembra que “o pasado domingo tivo lugar unha xornada gratuíta formativa especializada para facer escaparates de Nadal que contou cunha moi boa afluencia a fin de que os comerciantes que desexen tomar parte neste concurso tivesen unhas pautas comúns á hora de elaborar os escaparates: ofrecéuselles nocións dun escaparatismo feito con base artística, sostible e con temática de Nadal”.
A responsable das Aldeas de Nadal subliña “que ata o vindeiro venres, 8 de novembro, manterase aberto o prazo para que os comerciantes lalinenses continúen anotándose a participar neste proxecto de dinamización do comercio no Nadal que traerá sinerxías positivas para o sector”.
Elementos diferenciais
Fernández avanza que o “concurso de escaparates das Aldeas de Nadal desenvolverase entre o 13 de decembro e o 5 de xaneiro, ambos inclusive”. “Os escaparates máxicos van ter como elementos diferenciais unha casiña que lles entrega Aldeas de Nadal e ademais deberán relatar un conto ou unha historia máxicos que deberán reflectido no escaparate”, precisa.
A concelleira indica que “cada escaparate vai levar un código QR que lle dá Aldeas de Nadal co seu logotipo, de tal forma que os veciños e visitantes cando pasen por diante deles, poderán votar polos que máis lle gustan desde o seu móbil e a través dun código QR”. “Os dous máis votados recibirán os seguintes premios, sinala Karen:
- 1º premio: dotado con 500 € + as Aldeas de Nadal comprométense a facerlle o escaparate do ano que vén
- 2º premio: 500 €
A responsable municipal anima á participación neste proxecto piloto ao conxunto do comercio lalinense que terá sinerxías positivas para o sector que agarda que teña boa resposta e se consolide como un máis dos reclamos das Aldeas de Nadal.
O 7 de novembro abre o prazo para concertar convenios de colaboración
Por outra parte, a concelleira da área de Aldeas de Nadal, Karen Fernández, lembra que o vindeiro xoves 7 de novembro se abre o prazo de presentación de solicitudes para concertar convenios de colaboración empresarial das Aldeas de Nadal, de acordo ás bases aprobadas en xunta de goberno. O prazo manterase aberto ata o 20 de novembro. Establécese un único criterio de selección de colaboradores: a mellor subvención ofertada respecto a cada unha das seis Aldeas. A documentación deberá presentarse en sobre pechado no Rexistro Xeral do Concello de Lalín ou a través da Plataforma de Contratos do Sector Público.
