Concello de LALÍN

A concelleira de Cultura, Begoña Blanco, avanza que “Lalín nas Letras 2025”, programación municipal das Letras Galegas, trae a Lalín o concerto do recoñecido grupo de música galega, Tiruleque. Será nunha actuación gratuíta que terá lugar o vindeiro venres 16 de maio a partir das 21 horas na Praza da Igrexa.

Tiruleque é unha formación que leva 23 anos mesturando un repertorio baseado en cancioneiros tradicionais con outras moitas influencias, polo que conseguen un directo que contaxian o entusiasmo. Ao longo dos anos o grupo foi engadindo distintos instrumentos cos que levar máis aló a tradición e creatividade. Deste xeito, a banda consegue acadar maior expresión e un son propio recoñecible desde a primeira escoita que se plasma nos discos autoproducidos Tiruleque (2009), Mu!! (2013) e Outro que tal baila (2018).

Durante o concerto, que chega a Lalín a través do programa Máis Música da Deputación de Pontevedra, interpretarán algúns dos mellores temas dos catro traballos discográficos que ata o momento ten o grupo -ademais dos tres citados, ten o titulado Tiruleque, 20 anos no camiño (2022)-, así como novas composicións.

Este camiño está conformado por lugares, escenarios e persoas que marcaron o devir do grupo e o seu repertorio, que tivo a sorte de formar parte activa do mundo vivo que une aos galegos e galegas nas romarías, foliadas e bailes que celebran a cultura do país. Nos concertos van da man a pandereita e o contrabaixo, o pandeiro e o ukelele.

Elementos que nun principio non se imaxinan xuntos son asimilados e devoltos dunha forma propia e ao mesmo tempo universal, buscando a alegría e o espírito festivo que sentimos nós cando escoitamos estas músicas por primeira vez.

Tiruleque presenta unha longa traxectoria percorrendo a xeografía galega e estatal, deixando constancia da calidade dos seus directos coa participación en festivais de recoñecido prestixio como o Festival do Mundo Celta de Ortigueira, Pardiñas, Intercéltico do Morrazo ou Beltaine-Avilés, entre outros. Tamén teñen compartido escenario con recoñecidos artistas como Milladoiro, Xosé Manuel Budiño, Susana Seivane, Uxía, Treixadura, Xabier Díaz, Tanxugueiras ou Kepa Junkera, entre outros. A nivel internacional Tiruleque participou representando a Galicia no 41º e 49º Festival Intercéltico de Lorient.

Martes 6, documental “Fontán, o primeiro rostro de Galicia”

Ao longo deste mes sucederase a programación de actividades de “Lalín nas Letras 2025. Honrando ás nosas cantareiras”. Así mañá, martes 6 de maio, terá lugar, ás 11 horas, no Salón Teatro, nun acto aberto ao público, a proxección do documental “Fontán, o primeiro rostro de Galicia” para achegar á mocidade e á veciñanza en xeral, cunha linguaxe sinxela, o proceso que levou a Domingo Fontán a determinar, a través da Carta Xeográfica de Galicia, a orografía do territorio do país nunha época na que non existían as novas tecnoloxías. Anímase á veciñanza a participar nesta actividade gratuíta porque este documental é especialmente relevante para o Concello de Lalín que conta desde 2023 cun dos poucos mapas de Fontán conservados e onde un dos seus Fillos Ilustres, o Matemático de Bermés, foi mestre de Domingo Fontán.

Xoves 8, actividade participativa con explicación do libro “Cantareiras” e música en directo

A modo de homenaxe á figura das “Cantareiras”, a quen nesta edición 2025 se lle dedican as Letras Galegas, o vindeiro xoves 8 de maio, terá lugar a presentación do libro “Cantareiras” de autoría de Icía Varela e Xosé Manuel Varela e tamén terá lugar un concerto ao redor da música tradicional. Será nun evento aberto ao público que terá lugar ás 20.30 horas no Museo Municipal Ramón Mª Aller. É un percorrido polo legado da música e a poesía popular e pola tradición das pandereteiras da man da pandereteira Icía Varela e do docente e investigador Xosé Manuel Varela.

Esta actividade proponse ademais de como a presentación dun libro ao redor das protagonistas das Letras deste ano, tamén como un evento participativo e dinámico en torno á música tradicional, ás cantareiras e ás pandereteiras. Ofrecerase música en directo e explicarase a publicación de Cantareiras como un paseo polo legado das pandereteiras de Mens, Cerceda e Muxía co obxectivo de facer chegar aos asistentes á importancia da literatura oral.

Venres 9, teatro “Cortello de amor”

O venres 9 de maio terá lugar a función de teatro “Cortello de amor” de Amorodio Teatro, ás 21 horas no Salón Teatro, cunha entrada de 5 euros. Trátase dunha comedia sobre o alugueiro con Carmen Facorro e Javier Castiñeira.

A sinopse é a seguinte: Jack e Rose, unha parella que rolda a trintena e que levan xuntos desde a adolescencia, van a un concerto do seu grupo favorito, Grande Amore, nunha praza céntrica á beira do seu piso. Logo dunha festa memorable que paraliza a cidade pola afluencia masiva de público, os membros do grupo non conseguen arrincar a súa furgoneta. Rose e Jack, fans incondicionais, non o dubidan e deciden ofrecerlles a súa casa para pasar a noite, e durmir eles dúas no faiado.

Durante esa noite no rocho, descobren que a súa paixón reavívase neste pequeno espazo. Encantados coas marabillas do faiado, teñen a idea de sacar un diñeiro extra alugando a turistas o seu céntrico apartamento na zona vella dunha singular cidade galega, mentres eles aproveitan para pasar tempo no faiado, ao que chaman "niño de amor", reconectando como parella.

Todo vai como unha seda mentres os nosos protagonistas acumulan diñeiro e soños de futuro, pero a todo porco chégalle o seu San Martiño: co fin do verán os ingresos baixan, a falta de espazo persoal ameaza con dinamitar a súa relación, a súa veciña anciá, dona Virtudes (que aprecia moito o silencio, e ten algúns problemas de paranoia) parece disposta a facerlles a vida imposible, e o negocio de turismo porcino (un resort de natación con porcos nas Rías Altas) no que Jack investiu o diñeiro gañado, anúnciase un fracaso absoluto. Jack e Rose veranse, entón, abocados a tratar de non afogar nun naufraxio que eles mesmos causaron. Terán que enfrontarse ao feito de que o seu niño de amor é unha cuadra.

Teatro Amorodio debutou como compañía no ano 2021 con “Reino da extinción”. Con “A nai” fixeron a súa segunda produción, coa que obtiveron o premio Luisa Villalta a proxectos pola igualdade e a nominación á Mellor texto orixinal nos Premios María Casares 2024.

“Cortello de amor” é a súa terceira produción e con ela queren achegar o teatro a todas e todos os galegos. Para iso empregan música e a comedida, dúas das disciplinas máis reclamadas polo público.

Sábado 10, concerto de primavera da Banda de Música de Lalín

Este sábado 10 de maio, ás 20.30h, a Banda de Lalín volve ofrecer o seu esperado Concerto de Primavera, unha cita moi querida polo público que regresa tras anos de ausencia. Baixo a batuta do seu director titular, Marcel Van Bree, a agrupación presentará un programa con músicas de distintas partes do mundo. O concerto contará ademais coa participación especial dos clarinetistas Denís Iglesias Montes e Román Meijomín Procino, ambos formados no seo da banda. A cita será na Sala Tuno Valdés do Auditorio Municipal de Lalín. Desde a Banda convidan a toda a veciñanza a gozar dunha velada chea de música e emoción.

Martes 13, obra de teatro “As Josefas”

O martes, 13 de maio, ás 18 horas na Biblioteca Municipal terá lugar a actividade “As Josefas” de Lalá Teatro. Esta iniciativa de artes escénicas está enfocada a nenos/as de entre 4 a 12 anos. A sonoridade é o principal neste espectáculo de 50 minutos, xunto coas lendas e os contos, pero tamén a cultura galega. A compañía describe a actividade co seguinte reclamo: “Preparados pra concursar no <Galicia cada día mías linda máis linda?>. A obra está protagonizada por dúas irmás que queren demostrar que o galego está máis vivo que nunca e veñen ver canto coñeces ti da nosa terra. A música ten gran relevancia nesta espectáculo que, xunto con historias tradicionais, nos farán cantar e bailar, pero sobre todo aprender de Galicia. Sabes cantigas galegas? Vén concursar e coñecerás moitas cousas da nosa terra.

Venres 16, CorreLalín

O venres 16 a partir das 10.45 horas na Praza da Igrexa terá lugar CorreLalín, carreira dos centros educativos pola nosa lingua.

“Lalín nas Letras 2025. Honrando ás nosas Cantareiras” continúa ata o sábado 31 de maio cun abano amplo de actividades que se irán explicando proximamente.