- A comunicación dixital deste servizo municipal difundiu 1.107 ofertas de emprego a través de 48 boletíns publicados en Facebook nestes primeiros once meses de ano
- A avaliación de competencias, a identificación de competencias profesionais, a análise de obxectivos e o deseño de itinerarios individualizados que permiten trazar estratexias realistas e efectivas de acceso ao emprego centran o apoio á veciñanza
O Servizo de Orientación Laboral do Concello de Lalín, consolidado ao longo dos seus catro anos de funcionamento, reafírmase como un instrumento fundamental para o apoio á cidadanía no proceso de inserción laboral e desenvolvemento profesional.
Neste tempo, o servizo evolucionou ata converterse nun espazo de referencia, ofrecendo acompañamento especializado, información laboral actualizada e recursos personalizados destinados a mellorar a empregabilidade e fortalecer o tecido socioeconómico de Lalín e da Comarca de Deza.
A concelleira de Emprego, Beatriz Canda, subliña que “só nos últimos once meses, foron atendidas 970 persoas, ás que se lles aplicaron procedementos rigorosos de avaliación de empregabilidade, identificación de competencias profesionais, análise de obxectivos e deseño de itinerarios individualizados que permiten trazar estratexias realistas e efectivas de acceso ao emprego”.
“O servizo tamén desenvolve unha ampla gama de actuacións dirixidas a reforzar as capacidades das persoas demandantes de emprego, entre as que destacan a elaboración e revisión de currículos, o asesoramento técnico para procesos de selección, a preparación de entrevistas e o fortalecemento das habilidades comunicativas e da autoconfianza”, remarca.
Así mesmo, Beatriz Canda fai fincapé en que “estas accións complementan programas formativos e actividades de orientación adaptadas ás necesidades de cada usuario e á demanda actual do mercado laboral, favorecendo a adquisición de competencias clave e promovendo a mellora continua das persoas participantes”.
Perfís con maior demanda nestes 11 meses de ano
“Ademais, o Servizo de Orientación Laboral desempeña un papel estratéxico na optimización da relación entre oferta e demanda de perfís profesionais, contribuíndo activamente a crear sinerxías co tecido empresarial local e a impulsar un modelo de desenvolvemento económico sostible e inclusivo”, afirma.
A través do seu labor continuo, o servizo non só impulsa a inserción laboral das persoas usuarias, senón que tamén reforza a competitividade e a cohesión socioeconómica de Lalín e a súa Comarca, converténdose nun recurso imprescindible para avanzar cara a un mercado laboral dinámico, accesible e orientado ás necesidades reais da sociedade.
Sinais claros de dinamismo e oportunidades nos servizos, industria e construción
O panorama para Lalín amosa que aínda que o desemprego non desapareceu por completo, hai sinais evidentes de dinamismo e novas oportunidades. Estes avances percíbense con especial forza nos sectores dos servizos, da industria e da construción. Neste contexto, o papel do Servizo de Orientación Laboral resulta fundamental para conectar oferta e demanda, adecuar os perfís profesionais ás necesidades reais do mercado e favorecer a inserción laboral.
Retos e oportunidades
O sector servizos mantén un peso elevado tanto na demanda como na contratación, ofrecendo oportunidades reais de inserción laboral. A industria e a construción tamén aparecen como opcións para perfís concretos, aínda que con menor peso relativo. Isto subliña a importancia de recursos de apoio, orientación e formación adaptados ás necesidades reais do mercado local, como os que ofrece o Servizo Municipal de Orientación Laboral, para mellorar as perspectivas de emprego e lograr unha correspondencia efectiva entre demanda e oferta.
Presenza nas redes sociais
Desde novembro de 2021, o Servizo de Orientación Laboral do Concello de Lalín, en colaboración coa Consellería de Emprego, Comercio e Emigración, impulsa unha estratexia de comunicación dixital orientada a facilitar o acceso da cidadanía a oportunidades profesionais.
A posta en marcha dunha páxina e dun perfil específicos en Facebook permite canalizar información laboral actualizada de maneira rápida e eficiente, difundindo ofertas de emprego, recursos formativos e contido útil para a mellora da empregabilidade.
Mediante publicacións constantes e un boletín semanal estruturado, esta ferramenta reforza a conexión entre as persoas demandantes e o mercado laboral, consolidando ao Concello como un actor clave na dinamización do emprego e na difusión de oportunidades na Comarca do Deza. Desde comezos de ano ata finais de novembro, publicáronse 48 boletíns de ofertas de emprego cun total de 1.107 ofertas de emprego.
Pé de foto: A concelleira de Emprego, Beatriz Canda, con Laura Fernández, responsable do Servizo de Orientación Laboral do Concello de Lalín
